यवतमाळ : सोयाबीन बियाणे उगवणाबाबत मोठ्या प्रमाणात तक्रारी प्राप्त झाल्या आहेत. तक्रारींचा हा आकडा राज्यात ३० हजारांच्या जवळपास असून यापैकी ५० ते ६० टक्के तक्रारींचे निवारण करण्यात आले आहे. मात्र, असे असले तरी बियाणे उगवण संदर्भातील तक्रारींबाबत कोणतीही तडजोड केली जाणार नाही. यात दोषी कंपन्यांवर कारवाई करण्यात येईल, असा विश्वास कृषी तथा माजी सैनिक कल्याण मंत्री दादाजी भुसे यांनी शेतकऱ्यांना दिला.

शिवपुरी (ता. कळंब) येथे कृषी संजीवनी सप्ताहअंतर्गत शेतकरी संवाद, रोप वाटप व प्रगतशील शेतकऱ्यांच्या सत्कार समारंभात ते प्रमुख अतिथी म्हणून बोलत होते. या वेळी पालकमंत्री संजय राठोड, जिल्हा परिषद अध्यक्षा कालिंदा पवार, श्रीधर मोहोड, विजू राठोड, कृषी विभागाचे विभागीय सहसंचालक सुभाष नागरे, दुलिचंद राठोड, राजेंद्र गायकवाड आदी उपस्थित होते. कपाशीच्या बीटी-३ वाणाला परवानगी देण्याची मागणी केली असता कृषिमंत्री म्हणाले, की कापूस बीटी-३ हा विषय केंद्र शासनाच्या अखत्यारित येतो. या वाणाचा पर्यावरणीयदृष्ट्या काय परिणाम होतो, याबाबत संशोधन सुरू आहे.

दोषी आढळल्यास ‘महाबीज’वरही कारवाई राज्यासह यवतमाळ जिल्ह्यात सोयाबीनचे बियाणे उगविले नसल्याच्या मोठ्या प्रमाणात तक्रारी आहेत. या सर्व प्रकरणांची चौकशी सुरू आहे. दोषी आढळल्यास खासगी कंपन्यांसह महाबीज महामंडळावरही कारवाई करण्यात येईल, असा इशारा कृषिमंत्री दादा भुसे यांनी दिला.