जालना : जालना तालुक्यातील ईदेवाडी व सिरसवाडी शिवारात सुमारे २५ गायी शनिवारी (ता. ११) सकाळी दहा वाजण्याच्या सुमारास मृत अवस्थेत आढळून आल्याने खळबळ उडाली आहे. फोरएट नावाचे विषारी औषध खाल्ल्याने गायींचा मृत्यू झालाचा प्राथमिक अंदाज आहे.

शनिवारी सकाळी ईदेवाडी शिवारात सकाळी २० ते २५ गायी मृतावस्थेत आढळून आल्या. त्यानंतर नागरिकांनी या संदर्भात पोलिस प्रशासनासह जिल्हा पशुवैद्यकीय अधिकारी, महसूल प्रशासनाला माहिती दिली. त्यानंतर उपविभागीय पोलिस अधिकारी सचिन बारी, तहसीलदार बिपीन पाटील, पशुवैद्यकीय अधिकारी जे. एम. बुकतारे यांनी घटनास्थळी भेट दिली. दरम्यान, पशुवैद्यकीय अधिकारी यांनी घटना स्थळीच गाईचे शवविच्छेदन केले. या घटनेची माहिती मिळताच राज्यमंत्री अर्जुन खोतकर यांनीही घटनास्थळी भेट देऊन पाहणी केली.