चंद्रपूर ः सततची नापिकी, कर्जबाजारीपणा, शासकीय धोरणाला कंटाळत जिल्ह्यात शेतकरी आत्महत्यांचे सत्र सुरूच आहे. लॉकडाऊनमुळे शेतकऱ्यांसमोरील आव्हाने अधिकच वाढल्याने गेल्या पाच महिन्यांच्या कालावधीत तब्बल २२ शेतकऱ्यांनी आत्महत्या केल्याची माहिती समोर आली आहे.

कोरोना लॉकडाऊनमुळे प्रभावित होणाऱ्या इतर क्षेत्रांप्रमाणेच शेतीक्षेत्रही आहे. घरात पडून असलेल्या शेतमालाची विक्री अनेक शेतकऱ्यांना करता आली नाही. काही शेतकऱ्यांनी आर्थिक गरजांच्या पूर्ततेकरिता हमीभाव केंद्राऐवजी व्यापाऱ्यांनाच आपला शेतमाल कमी दरात दिला. त्यानंतरही परिस्थितीत बदल न झाल्याच्या नैराश्‍यातून अखेरीस जिल्ह्यात तब्बल २२ शेतकऱ्यांनी मृत्यूला कवटाळले.

गेल्या पाच महिन्यांत जिल्ह्यात या शेतकरी आत्महत्यांची नोंद करण्यात आली आहे. आत्महत्याग्रस्त कुटुंबीयांना एक लाख रुपयांच्या मदतीचे धोरण शासनाचे आहे. त्याकरिता विहीत नियमावलीदेखील तयार करण्यात आली आहे. परंतु सद्यःस्थितीत प्रशासकीय यंत्रणा कोरोना संदर्भातील कामात गुंग असल्यामुळे मदतीसाठी पात्र, अपात्र शेतकरीविषयक बैठकच घेण्यात आली नाही. परिणामी, या कुटुंबीयांना मदतीपासूनही वंचित राहावे लागत आहे. विशेष म्हणजे लॉकडाऊनची तीव्रता एप्रिल महिन्यात वाढली होती. त्या काळात जिल्ह्यात सर्वाधिक आठ आत्महत्यांची नोंद झाल्याचे सांगण्यात आले.