रत्नागिरी ः संगमेश्वर तालुक्यातील कोंडये-डावखोल गावावर सध्या निसर्गाचा प्रकोप पाहायला मिळत आहे. गेला आठवडाभर पडत असलेल्या मुसळधार पावसाने या गावामधून वाहणाऱ्या नदीने प्रवाहच बदलल्याने नदी थेट भातशेतीमधून वाहत आहे. सुमारे २०० एकर भात जमीन धोक्यात आली आहे. पावसाचा जोर कमी होऊनदेखील सध्या नदीचा बदललेला प्रवाह तसाच आहे. भातशेती लावणीची कामे पूर्ण झाली होती. पावसामुळे पीकही तरारू लागली आहेत. अशातच अतिवृष्टीमुळे नदीचा मूळ प्रवाह बदलला गेला असून, भातशेतीची वाताहत झाली. पंचनामे झालेत पण अजून नुकसानीची भरपाई इथल्या शेतकऱ्यांना मिळालेली नाही. योग्य नुकसानभरपाई मिळावी आणि या नदीतील गाळ उपसला जावा अशी मागणी प्रशासनाकडे करण्यात आली असल्याचे कोंडये गावच्या सरपंच पूनम देसाई आणि डावखोलच्या सरपंचांनी सांगितले आहे.