चंद्रपूर : गेल्या खरीप हंगामात विक्री केलेल्या धानाचे बोनस न मिळाल्याने ऐन खरिपाच्या तोंडावर शेतकऱ्यांना आर्थिक संकटांना सामोरे जावे लागत आहे. जिल्ह्यातील तब्बल नऊ हजार ५१२ शेतकऱ्यांचे बोनस थकीत असून ते त्वरित वितरित करावी, अशी मागणी आहे. 

जिल्ह्यात गेल्या दोन वर्षांपासून शेतकरी आदिवासी विकास महामंडळाने प्राधिकृत केलेल्या विविध कार्यकारी सोसायट्यांना धान्य विक्री करीत आहेत. पणन महासंघाकडून देखील धान खरेदी केंद्रे सुरू केली जातात. या केंद्रांवर देखील धानाची विक्री होते. चिमूर प्रकल्पात यावर्षी २९ आदिवासी सोसायट्यांमार्फत ९५१२ शेतकऱ्यांकडून दोन लाख ५३ हजार क्विंटल धान खरेदी करण्यात आली. या शेतकऱ्यांना त्यांच्या धानाचे चुकारे अदा करण्यात आले. मात्र १७ कोटी ७२ लाख ३५९ रुपयांचा बोनस थकीत आहे. गेल्या सहा महिन्यांपासून थकीत असलेली बोनसची रक्कम मिळावी याकरिता शेतकरी अनेक पातळ्यांवर पाठपुरावा करीत आहेत. मात्र त्यांना यश आले नाही. 

चिमूर आदिवासी प्रकल्पात नागभिड, चिमूर, सिंदेवाही, भद्रावती, वरोरा या तालुक्याचा समावेश होतो. मात्र नागभीड, सिंदेवाही व चिमूर या तालुक्यातच धानाचे उत्पादन मोठ्या प्रमाणावर घेतले जाते. नोव्हेंबर-डिसेंबर महिन्यात धानाचे पीक शेतकऱ्यांच्या हातात येते. त्यानंतर शेतकरी धान विक्रीला आणतात. शासनाने आदिवासी दोन वर्षांपूर्वी विविध कार्यकारी सोसायट्यांना धान खरेदीचे अधिकार दिले. सोसायट्यांकडून १८३५ रुपये हमी भाव आणि सातशे रुपये बोनस याप्रमाणे खरेदी करण्यात आली. खरेदीची रक्कम मिळाली असली तरी बोनसची प्रतीक्षा मात्र शेतकऱ्यांना आहे. शेतकऱ्यांना बोनस मिळावी याकरिता प्रशासकीय पातळीवर याद्या तयार करण्याचे काम युद्धपातळीवर सुरू असल्याची माहिती आदिवासी विकास प्रकल्प विभागाकडून देण्यात आली.