मुंबई: महाराष्ट्रातील कोरोना बाधितांची संख्या दिवसेंदिवस वाढतच आहे. त्यात महाराष्ट्राची राजधानी मुंबई कोरोनाचं प्रमुख लक्ष्य ठरली आहे. मुंबईत शनिवारी पुन्हा 5 रुग्ण आढळले आहेत. या व्यतिरिक्त पुण्यात 1 आणि नागपूरमध्येही 2 कोरोना बाधित रुग्ण आढळला. आता महाराष्ट्रातील कोरोना बाधितांची संख्या १५९ वर पोहचली आहे. भारतात कोरोना बाधित रुग्णांच्या यादीत महाराष्ट्र पहिल्या क्रमांकावर आहे.

कोरोनाचा संसर्ग वाढू नये म्हणून राज्य सरकारसोबतच केंद्र सरकारकडूनही संचारबंदी आणि जमाबंदीचे आदेश देण्यात आले. देशभरात लॉकडाऊनचीही घोषणा झाली. मात्र, त्यानंतरही कोरोना रुग्णांची संख्या सातत्याने वाढताना दिसत आहे. यामुळे आरोग्य यंत्रणा अलर्ट झाल्या आहेत. कोरोनाचा समाजात मोठ्या प्रमाणात संसर्ग टाळण्यासाठी अनेक प्रयत्न केले जात आहेत.