सोलापूर ः कोरोना संकटात प्रशासनाला मदत व्हावी, यासाठी येथील कोठारी ग्रुप्सच्या कर्मचारी व व्यवस्थापनाच्या वतीने पंतप्रधान व मुख्यमंत्री रिलीफ फंडासाठी १५ लाख रुपये मदतनिधी देण्यात आला. 

मदतीचा धनादेश नुकताच कंपनीचे संचालक आशिष कोठारी यांनी जिल्हाधिकारी मिलिंद शंभरकर यांच्याकडे सुपूर्त केला. २३ मार्चपासून देशात लॅाकडाऊन जाहीर झाला आहे. त्या दिवसापासूनच कोठारी ग्रुप्सने आपली सर्व युनिट्स बंद ठेवून सामाजिक आवाहनाला प्रतिसाद दिला. 

तसेच लॅाकडाऊन कालावधीत अन्नधान्याची जमवाजमव करू न शकलेल्या मोहोळ शहरातील २०० कुटुंबीयांना ग्रुपतर्फे जीवनावश्यक वस्तूंचा पुरवठा करण्यात आला. कोरोना पार्श्वभूमीवर देशवासीय एकत्र येतील व संकटाचा मुकाबला करतील. तसेच कोरोनाला देशातून हाकलून लावतील, असा विश्वास यावेळी श्री. कोठारी यांनी व्यक्त केला. 

पंतप्रधानांनी केलेल्या आवाहनाला कोठारी ग्रुप्सने सहकार्य करत आपला वाटा उचलत १५ लाख रुपयांची मदत दिली. त्यानुसार ही मदत दिल्याचे त्यांनी सांगितले.