रत्नागिरी  ः ‘हुरा रे हुरा आणि आमच्या ग्रामदेवतेचा सोन्याचा तुरा रे होलिओऽऽऽ’ अशा फाका देत कोकणात शिमगोत्सव साजरा केला जात आहे. आंबा, सुरमाड, पोफळीसह करजांची होळी करून ती जाळण्याची प्रथा आजही कायम आहे. या सणासाठी हजारो चाकरमानी मुंबईहून कोकणात दाखल झाले आहेत. तिखटा आणि गोडा असा दोन्हीचा संगम या शिमग्यात साधला जातो. ग्रामदेवतांच्या सजलेल्या पालख्या घराघरांमध्ये दर्शनासाठी आणल्या जात आहेत.

कोकणातील चारही जिल्ह्यांत शिमगोत्सव हा सण मोठ्या उत्साहात आणि आनंदात साजरा केला जातो. रत्नागिरी जिल्ह्यात तो एका वेगळ्या पद्धतीने साजरा होतो. फाल्गुन महिन्याचे शुक्ल पक्षाचे पंचमी म्हणजेच ‘फाकपंचमी’ला शिमगोत्सव सुरू होतो. शिमगा सणातील महत्त्वाचे कार्यक्रम म्हणजे फाकपंचमीला फोकट होळी उभी करून तिचा दररोज रात्री होम केला जातो. सोमवारी (ता. ९) रात्री बहुतांश गावांमध्ये होळी आणून होम केले जातात. होळीसाठी शेवर, आंबा, सुपारी आदी झाडांचा वापर केला जातो. शेवरीच्या झाडाचा मोठ्या प्रमाणात वापर होतो. होम करण्यासाठी गवत, कवळ, काडीकचरा, शेणाच्या गोवऱ्यांचा वापर केला जातो.

‘हुरा रे हुरा’ आणि ‘आमच्या ग्रामदेवतेचा सोन्याचा तुरा रे होलिओऽऽऽ’ अशा फाका किंवा एखाद्याच्या अवगुणांवरही फाकांनी गावातील वातावरणात वेगळाचा रंग भरला जात आहे. कामानिमित्त परजिल्ह्यात राहणारे अनेक चाकरमानी रविवारी कोकणात दाखल झाले आहेत. शिमगोत्सवात ग्रामदेवतेची पालखी सजवली जाते म्हणजे रूपे लावली जातात. होळीचा होम झाल्यानंतर पालख्या गावोगावी फिरवण्यात येतात.