अकोला  ः ‘कोरोना’चा वाढता प्रादूर्भाव सध्या चिंतेचा विषय आहे. गाव- खेड्यांमध्ये ‘कोरोना’चा शिरकाव होत आहे. ‘कोरोना’वर औषध उपलब्ध नसल्याने आता रोगप्रतिकारक शक्ती वाढविणे हाच एकमेव पर्याय आहे. आयुष मंत्रालयाने दिलेल्या मार्गदर्शक सूचनांनुसार कोरोना या संसर्गजन्य आजारावर प्रतिबंधात्मक उपाय म्हणून आर्सेनिक अल्बम ३० या होमिओपॅथी औषधाचा वापर केल्यास फायदा होतो, असे नमूद करण्यात आल्याने स्मार्ट ग्राम सिंदखेडमधील (ता. मोताळा जि.बुलडाणा) प्रत्येक कुटुंबाला हे औषध देण्याचा निर्णय ग्रामपंचायतीने घेतला आहे. याची अंमलबजावणीसुद्धा सुरु केली आहे.

ग्राम सामाजिक परिवर्तन आभियानात कार्यरत असलेल्या सिंदखेड येथे सरपंच विमल अर्जुन कदम या ग्रामस्थांच्या साथीने कार्य करीत आहेत. सिंदखेड ग्रामपंचायत आयएसओ प्रमाणित तसेच स्मार्ट ग्राम घोषित झाली आहे. सिंदखेड ग्रामपंचायत, स्वयंसेवक तसेच ग्रामस्थ एक जुटीने कोरोनाचा वाढता प्रादुर्भाव रोखण्यासाठी कार्य करीत आहे.

‘कोरोना’च्या पार्श्वभूमीवर आर्सेनिक अल्बम औषध रोगप्रतिकार शक्ती वाढविण्यासाठी उत्तम आहे. त्यामुळे गावाने हे औषध गावातील 2600 लोकांना ग्रामवर्गणीतून मोफत देण्याचा निर्णय घेतला. सर्व वयोगटतील व्यक्तींना हे औषध दिले जात आहे. डॉ. अतुल पिंप्रीकर, डॉ. अनंता घानोकर यांच्या मार्गदर्शनात प्रवीण वैराळकर, ग्रामपंचायत उपसरपंच अशोक माळेकर, सचिव राजेंद्र वैरलकर, सदस्य प्रवीण जाधव, राजू भुसारी तसेच अंगणवाडी सेविका शुभांगी मोरे, माजी उपसरपंच ज्योती मोरे, तंटामुक्ती अध्यक्ष ज्ञानदेवराव गडाख, पदमाकर अलोने, पवन म्हस्के, प्रकाश लवांडे आदी हे काम करीत आहेत.