नगर  ः कोरोनाची लक्षणे असणाऱ्या व्यक्तींची तातडीने तपासणी होण्यासाठी जिल्हा रुग्णालयात कोरोना चाचणी प्रयोगशाळा उभारण्यात आली आहे. ही जिल्हा रुग्णालय स्तरावरील (वैद्यकीय महाविद्यालय संलग्न नसताना) राज्यातील पहिलीच लॅब आहे. प्रत्येक शिफ्टमध्ये शंभर, याप्रमाणे २४ तासांत ३०० चाचण्या करण्याची या लॅबची क्षमता असणार आहे. इंडियन कौन्सिल फॉर मेडिकल रिसर्चच्या (आयसीएमआर) अधिकृत मान्यतेनंतर या चाचण्यांना सुरवात होणार आहे.

पालकमंत्री हसन मुश्रीफ यांनी गुरुवारी या लॅबची पाहणी केली. जिल्हाधिकारी राहुल द्विवेदी, पोलिस अधीक्षक अखिलेश कुमार सिंह, जिल्हा शल्य चिकित्सक डॉ. प्रदीप मुरंबीकर, जिल्हा आरोग्य अधिकारी डॉ. संदिप सांगळे, नोडल अधिकारी डॉ. बापूसाहेब गाढे, जिल्हा नियोजन अधिकारी नीलेश भदाणे आदी उपस्थित होते. आयसीएमआर लवकरच या ठिकाणी चाचण्यांना परवानगी देईल, अशी खात्री मुश्रीफ यांनी व्यक्त केली.