लहान मुलांच्या शिक्षणपद्धतीमध्ये रोबोट हे पूर्णपणे शिक्षकांची जागा घेऊ शकणार नाहीत. मात्र, सहायक म्हणून अत्यंत मोलाची भूमिका ते नक्कीच निभाऊ शकतील, असे प्लायमाउथ विद्यापीठातील संशोधकांना आढळले आहे. प्लायमाउथ विद्यापीठातील रोबोटिक्सचे प्रा. टोनी बेल्पाईमे यांनी सांगितले, की अनेक वर्षांपासून वर्गासाठी खास रोबोट्स निर्मिती करण्याचा प्रयत्न संशोधक करत आहेत. केवळ तंत्रज्ञान आणि गणिताच्याच नव्हे, तर सामाजिक रोबोट्स निर्मितीकडेही कल आहे. फळा, खडू, कागदपासून संगणक, टॅबलेटपर्यंत पोचलेल्या शिक्षणव्यवस्थेमध्ये भविष्यात रोबोट्स दिसू लागतील. त्यामुळे शिक्षकांना विद्यार्थ्यांच्या एकूण प्रगतीकडे लक्ष ठेवण्यासाठी वेळ मिळू शकेल.