नाशिक : दळणवळणाला बूस्ट देण्यात हातभार लागणाऱ्या भारतमालांतर्गत ‘ग्रीनफील्ड महामार्ग’ संकल्पनेनुसार सुरत-चेन्नई हा ग्रीनफील्ड महामार्ग जिल्ह्यातील सहा तालुक्यामधून जाणार आहे. मात्र नाशिक तालुक्यातील आडगाव, लाखलगाव, ओढा, विंचूर गवळी येथील शेतकऱ्यांनी भूसंपादनास विरोध केला आहे. त्यांनी जमिनीचा मोबदला कसा देणार याबाबत स्पष्टीकरण मागितले आहे. शेतकऱ्यांनी नाशिकचे खासदार हेमंत गोडसे यांची भेट घेऊन निवेदन दिले. 

भूसंपादनाची अधिसूचना काढण्यापूर्वी ज्या शेतकऱ्यांच्या जमिनी या प्रकल्पात जाणार आहे. त्यांच्यासमोर प्रकल्पाचे सादरीकरण करणे आवश्‍यक होते. त्याचबरोबर भूसंपादनाचा मोबदला कसा देणार, याबाबत माहिती मिळणे गरजेचे आहे. अधिसूचना जाहीर करताना जिरायती क्षेत्र दाखविण्यात आले आहे. परंतु वास्तविक बागायती क्षेत्र असून भूसंपादन करताना शेतकऱ्यांवर अन्याय होणार असल्याचा दावा करण्यात आला. 

ज्या जमिनी प्रकल्पासाठी घेतल्या जाणार आहेत. त्या महामार्गाला लागून आहेत. त्यामुळे सर्व्हिस रोड, अंडर पास यासंदर्भात काय तरतूद आहे, अशी माहिती मिळावी. या वेळी ॲड. प्रकाश शिंदे, शिवसेनेचे उपमहानगरप्रमुख सुनील जाधव, विनायक कांडेकर, प्रदीप कांडेकर, तानाजी जाधव, प्रभाकर कांडेकर, भरत जाधव, गणेश ढिकले, अशोक शिंदे, भाऊसाहेब नाठे आदी उपस्थित होते.