अमळनेर, जळगाव : येथील कृषी उत्पन्न बाजार समितीत सोमवारी (ता. ७) मालाची विक्रमी आवक झाली. बाजार समितीबाहेर धुळे - चोपडा रस्त्यावर दोन किलोमीटरची वाहनांची रांग लागली होती. 

अमळनेर बाजार समितीत मुख्य प्रशासक तिलोत्तमा पाटील यांच्यासह आठ प्रशासक नियुक्त करण्यात आले असून, शेतकऱ्यांच्या हितासाठी आणि कोरोनातील आर्थिक अडचणीतून बाहेर येण्यासाठी शेतकऱ्यांचा माल विक्री होताच त्यांना त्याच दिवशी रोखीने मालाचा मोबदला देण्याचे नियोजन करण्यात आले आहे. त्यामुळे तालुक्यातीलच नव्हे तर पारोळा, चोपडा, शिरपूर, शिंदखेडा, धरणगाव आदी विविध तालुक्यातून शेतकऱ्यांनी आपला माल विक्रीसाठी आणला होता. गहू, हरभरा, मका, बाजरी, कापूस, सूर्यफूल, धना आदी मालाची आवक सोमवारी बाजार समितीत झाली होती. 

बाजार समितीबाहेर रस्त्यावर देखील वाहने उभी होती. लिलावाच्या ठिकाणी शेतकऱ्यांसाठी पाणी व इतर सुविधा करण्यात आली होती. व्यापाऱ्यांनी देखील शेतकऱ्यांची गैरसोय होऊ नये, यासाठी मोबदला देण्याची व्यवस्था केली. हरभऱ्याची ७ हजार क्विंटल खरेदी झाली तर ४५४६ ते ७००० च्या मर्यादेत हरभऱ्याला भाव देण्यात आला. गव्हाला कमाल २,३४५ रुपये क्विंटल भाव देण्यात आला. ३ हजार क्विंटल गव्हाची खरेदी झाली. मक्याला १९२६ रुपये भाव होता. सुमारे १५०० क्विंटल मका खरेदी झाला. तुरीला ५६०० रुपये, सूर्यफुलास ६,८३५ रुपये भाव देण्यात आला. सोयाबीन, धने, बाजरी, दादर, ज्वारी असा एकूण १५ हजार क्विंटल माल खरेदी करण्यात आला. सायंकाळपर्यंत शेतकऱ्यांचा माल खरेदी करण्यात येत होता. बाजार समितीतील व्यापारी व कर्मचारी वर्गाच्या सहकार्याने धान्य खरेदी- विक्रीची व्यवस्था सुलभ होते. शेतकऱ्यांच्या मालाला अधिकचा भाव कसा मिळेल, यासाठी संचालक मंडळाचा प्रयत्न असतो, असे प्रशासनामे म्हटले आहे. 

शेतकऱ्यांना जास्तीत जास्त सुविधा देण्याचा आमचा मानस आहे. योग्य भाव आणि रोखीने पेमेंट यामुळे अमळनेर बाजार समितीत विविध तालुक्यातून आवक होते.  - तिलोत्तमा पाटील,   मुख्य प्रशासक, बाजार समिती, अमळनेर (जि.जळगाव)