Jalgaon News: खानदेशात सध्या कलिंगडाची आवक अल्प आहे. आवक कमी असल्याने दर टिकून राहतील, असा अंदाज होता. पण दर अस्थिर असून, सात ते १२ रुपये प्रतिकिलोचा दर दर्जानुसार कलिंगडास शिवार खरेदीत शेतकऱ्यांना मिळत आहे.

कलिंगडाची लागवड खानदेशात सुरूच आहे. मागील किंवा खरिपात व लेट खरीप हंगामात पिकात रोगराई आल्याने अतोनात हानी झाली. एक ते दीड महिन्याचे पीक ऐन फळे लगडल्याच्या काळात हातचे गेले.

कलिंगडाचा एकरी खर्च ६५ ते ७० हजार रुपये आहे. एवढा खर्च अनेकांचा वाया गेला. पण रब्बीत लागवड वाढली आहे. खानदेशात कलिंगड लागवड सुमारे सात हजार हेक्टरवर झाली आहे. एकट्या जळगाव जिल्ह्यातील लागवड साडेपाच हजार हेक्टरपेक्षा अधिक आहे.

यंदा सप्टेंबर, ऑक्टोबर, नोव्हेंबरमध्ये, डिसेंबर व जानेवारीतही लागवड कमी झाली आहे. पुढेही लागवड सुरू राहील. आवक सुरू झाली आहे. कलिंगडाची आवक फेब्रुवारीत बऱ्यापैकी सुरू होईल, अशी स्थिती आहे.

मागील वर्षी डिसेंबर, जानेवारीत मिळून सुमारे अडीच हजार हेक्टरवर खानदेशात कलिंगडाची लागवड झाली होती. लागवडीत जळगाव जिल्ह्यातील जामनेर, चोपडा, यावल, धुळ्यातील शिरपूर, धुळे, नंदुरबारातील तळोदा व शहादा तालुका आघाडीवर होता. यंदा मात्र सर्वत्र लागवड वाढत आहे. फेब्रुवारीतही लागवड बऱ्यापैकी होईल.

यंदा कलिंगड बियाण्याची मागणी अधिक असल्याने त्याची जादा दरात विक्री, टंचाई असे प्रकारही झाले आहे. बियाणे, खतांची दरवाढ झाल्याने खर्चही वाढला आहे. अशात शेतकरी किमान ११ ते १२ रुपये दर जागेवर मिळावा, अशी अपेक्षा करीत आहेत.