Jalgaon News: खानदेशात यंदा तूर लागवड घटणार आहे. पूर्वहंगामी लागवड सुरू झाली आहे. यंदा तुरीखालील क्षेत्रात सुमारे ४० ते ५० टक्के घट होईल, असा अंदाज आहे.मागील हंगामात सुमारे १६ हजार हेक्टरवर झाली होती. मागील वेळेस लागवड वाढली होती. जळगाव जिल्ह्यात सुमारे ११ हजार हेक्टवर तूर पीक होते. मागील दोन वर्षे तूर लागवड सतत वाढली. अनेकांनी सोयाबीनमध्ये आंतरपीक म्हणून तूर लागवड केली होती. कापूस पिकातही तुरीचे आंतरपीक होते.

मागील दोन वर्षे तूर दर टिकून राहिले. कमी व अधिक पावसातही तूर पीक हाती आले. त्यातून चाराही आला व जमीन सुपीकतेलाही मदत झाली. शिवाय अन्य पिकांच्या तुलनेत खर्च कमी लागला. कापूस पीक खर्चिक बनले आहे. मजूर, किडनाशके आदींचा मोठा खर्च कापसावर करावा लागतो.

यामुळे तूर लागवडीत वाढ झाली होती. परंतु यंदा तुरीचे दर कमी होते. उत्पादन बरे आले. पण दर अल्प होते. यामुळे नफा कमी झाला. यंदा अनेक जण लागवड कमी करतील, असे दिसत आहे. जळगाव जिल्ह्यात सुमारे चार ते पाच हजार हेक्टरवर लागवड होईल, असे दिसत आहे.

तुरीसाठी खानदेशात जळगावातील मुक्ताईनगर, रावेर, बोदवड, जामनेर हा भाग प्रसिद्ध आहे. तसेच अन्य भागात कापूस पिकात तूर लागवड असते. धुळ्यातील धुळे, शिंदखेडा, नंदुरबारातील नवापूर, नंदुरबार भागातही तूर लागवड बऱ्यापैकी असते. पण यंदा तुरीखालील क्षेत्रात सुमारे ४० ते ५० टक्के घट होईल, असा अंदाज आहे. पण पूर्वहंगामी तूर लागवड रावेर, यावल, चोपडा भागात सुरू आहे. अनेकांनी संकरित, संशोधित तूर वाणांची लागवड केली आहे. काही तूर वाणांचा खानदेशात तुटवडादेखील आहे.

तूर आवक २०२३ मध्ये कमी होती. त्यामुळे दर अखेरपर्यंत टिकून राहीले. दर्जेदार तुरीला १० हजार रुपये प्रतिक्विंटलपर्यंतचा दर मिळाला होता. पण आता तूर दर कमी आहेत. यामुळे तूर लागवड यंदा कमी होईल.