Mango Market वातावरणातील बदलांमुळे (Climate Change) यंदा हंगामाच्या मध्यात हापूसची आवक (Hapus Arrival) कमीच राहिली आहे. त्यामुळे सध्या कोकणातून मुंबईतील वाशी बाजारात अवघा १७ हजार पेटीच आंबा पाठविला आहे.

आवक कमी असल्याने बाजारातील दर पाच डझनच्या पेटीला साडेतीन हजार रुपये आहे. तर आंबा कमी असल्यामुळे कॅनिंगचे (प्रक्रिया उत्पादनांसाठीचा आंबा) दर वधारलेले असून किलोला ५० ते ६० रुपये आकारले जात आहेत.

वातावरणाने दगा दिल्यामुळे यावर्षी हापूसचे उत्पादन मोठ्या प्रमाणात घटलेले आहे. कोकण कृषी विद्यापीठाच्या अहवालानुसार १५ टक्केच उत्पादन शेवटपर्यंत हाती येणार आहे.

एप्रिलच्या दुसऱ्या पंधरवड्यापासून आंबा कमी झाला. त्याचा परिणाम सर्वांत मोठ्या वाशी बाजारपेठत दिसून आला. ऐन हंगामात म्हणजेच मार्च महिन्यात ५० हजारांपर्यंत प्रतिदिन आंबा पेटी कोकणातून जात होती.

ती ३५ हजारांपर्यंत आली. अक्षयतृतीयेला यंदा सर्वांत कमी नोंद झाली. ही घट अजूनही सुरूच आहे. शुक्रवारी (ता. २८) वाशीला कोकणातून १७ हजार पेट्या गेल्या आहेत. कर्नाटकसह अन्य राज्यांतून येणाऱ्या आंब्याच्या पेट्यांची संख्या ६५ हजारांवर आहे. त्याच आंब्याचे कोकणच्या हापूसपुढे आव्हान आहे.

हापूसच्या दर्जेदार फळाच्या पाच डझनाच्या पेटीला साडेतीन हजार रुपये दर मिळतोय. उर्वरित छोट्या फळांना त्यापेक्षा कमी दर मिळत आहे. गतवर्षीच्या तुलनेत यंदा हापूसचा दर पाचशे रुपयांनी अधिक आहे.

दरम्यान, प्रक्रिया उद्योगांसाठी लागणारा आंबा कमी असल्याने दर वधारलेले आहेत. गतवर्षी कॅनिंगसाठीचा आंबा प्रति किलो ३० ते ३५ रुपयांनी खरेदी केला जात होता. यंदा हाच आंबा सुरुवातीला ५० ते ०६ रुपये किलोने खरेदी केला जात आहे. १० मे नंतर आंब्याची आवक वाढेल, अशी शक्यता आहे.