Sangli News : देशातील महत्त्वाच्या हळद बाजारपेठांतील हळद विक्रीचा हंगाम आटोपला आहे. गेल्या दोन महिन्यांपासून हळदीचे दर टिकून आहेत. बाजारात प्रतवारीनुसार हळदीला प्रतिक्विंटल १६ हजारांपासून ते १८ हजार रुपये असा दर आहे.

मराठवाडा आणि इरोड या बाजारपेठेत हळद विक्री सुरू आहे. मराठवाड्यातील हळद विक्री काही दिवसांत उरकण्याची शक्यता असून इरोड बाजारात वर्षभर हळद विक्री होते. त्यामुळे येत्या महिनाभर हळदीच्या दरात फारसे चढ-उतार होण्याची चिन्हे नसल्याचा अंदाज हळद उद्योगातील जाणकारांनी व्यक्त केला.

देशात प्रामुख्याने हळद विक्रीचा हंगाम मार्चपासून मे अखेर असा तीन महिन्यांचा कालावधी असतो. या दरम्यान, हळदीच्या दरात अनेक वेळा चढ-उतार होतात. त्यामुळे शेतकरी हळद विक्री करताना आवक आणि दराची परिस्थिती पाहूनच विक्री करतात. गेल्या तीन ते चार वर्षांत हळदीचे दर सरासरी ८ हजार रुपयांपर्यंत होते. त्यामुळे शेतकरी हळद विक्री थांबवतात. परिणामी देशात शेतकरी आणि व्यापाऱ्यांकडे २५ ते ३० लाखांपेक्षा अधिक पोती विक्रीची असतात.

गतवर्षी कमी पावसामुळे हळदीची लागवड कमी झाल्याने उत्पादन ५५ ते ६० लाख पोत्यांचे झाल्याचे व्यापाऱ्यांनी सांगितले. त्यामुळे मुळात गतवर्षीचा हळद विक्रीचा हंगाम सुरू झाल्यापासून हळदीचे दर तेजीत राहिले. बाजारपेठेतील हळदीची आवक आणि दराची स्थिती पाहूनच शेतकऱ्यांनी हळदीची विक्री करण्यास सुरवात केली. त्यामुळे बाजारात आवक कमी आणि मागणी अधिक असल्याने हळदीच्या दरात दुप्पट वाढ झाली. त्यामुळे हळद उत्पादकांना मोठा दिलासा मिळाला.

देशातील बाजारपेठेत दररोज ५०० ते १००० पोत्यांची आवक सुरू आहे. मराठवाड्यातील नांदेड, हिंगोली, बसमत, वाशीम, रिसोड आणि हिंगोलीत हळद विक्री सुरू आहे. इरोडमध्ये वर्षभर हळदीची विक्री होते. गतवर्षी या भागात शेतकऱ्यांनी हळदीची फारशी लागवड केली नाही. इरोड बाजारात दररोज २००० हजार पोत्यांची आवक होते. विक्री हंगाम सुरू झाल्यापासून हळदीच्या दरात फारशी तेजी-मंदी झाली नाही. त्यामुळे दर टिकून आहेत. या महिन्यातही हळद दरात फारसे चढ-उतार होण्याची शक्यता नाही.

प्रतवारीनुसार हळद दर (प्रतिक्विंटल)

महिना ः एप्रिल २०२४

लगडी ः २१ ते २२ हजार रुपये

पावडर क्वॉलिटी ः १७ ते १७५०० रुपये

मध्यम ः १७ ते १७५०० रुपये

उच्च प्रतिची ः १९ ते २१ हजार रुपये

मे २०२४

पावडर क्वॉलिटी ः १७,२०० ते १८०००

कणी ः १६ ते १६५००

मध्यम ः १८,२०० ते १८,५००

जून २०२४

मध्यम ः १७,५०० ते १८२००

कणी ः १६,००० ते १६५००

पावडर क्वॉलिटी ः १६५०० ते १७५००