Nagpur News : खाद्यतेल आयात शुल्कात केलेल्या वाढीमुळे सोयाबीन दरात तेजी येईल, अशी अपेक्षा व्यक्‍त होत होती. प्रक्रिया उद्योजकांनी स्वहित जपत खाद्यतेल दरात वाढ केली. याउलट आयात शुल्क वाढीचा परिणाम दरावर झाला नाही.

या विषयात केंद्राने हस्तक्षेप करीत सोयाबीन उत्पादकांना दिलासा द्यावा, अशी मागणी मध्य प्रदेशातील किसान संघाचे नेते अर्जुन पाटीदार यांनी केली.

केंद्रीय कृषिमंत्री शिवराजसिंह चौहान यांना लिहिलेल्या पत्रातून पाटीदार यांनी ही मागणी निवेदनाद्वारे केली आहे. त्यात म्हटले आहे, की देशात मध्य प्रदेश हे सोयाबीन उत्पादकतेत आघाडीवर आहे.

गेल्या काही वर्षांत नैसर्गिक कारणांमुळे सोयाबीनची उत्पादकता कमी होत असल्याने चिंता वाढली आहे. एकीकडे सोयाबीनची उत्पादकता कमी होत असताना नव संशोधित बियाणे व तंत्रज्ञान देण्याची गरज आहे.

त्याकडेही सरकारचे दुर्लक्ष होत आहे. या वर्षी केंद्राने सोयाबीनला ४८९२ रुपयांचा हमीभाव जाहीर केला आहे. परंतु देशातील एकाही बाजारात सोयाबीनला हा दर मिळालेला नाही. त्यावरूनच स्थिती गंभीर असल्याचे सिद्ध होते, असेही निवेदनात म्हटले आहे.