Jalana News : गावासह परिसरात अनेक शेतकऱ्यांनी सोयाबीनची पेरणी केली होती. नव्या सोयाबीनची मंगळवारी (ता. २६) आठवडे बाजारात खासगी व्यापाऱ्यांकडे आवक सुरू झाली. नव्या सोयाबीनला ४ हजार ७०० रुपये प्रतिक्विंटल असा दर मिळाला. जवळपास ३० क्विंटल सोयाबीनची आवक झाली होती.

पिंपरखेड तालुका घनसावंगी येथील शेतकरी लिंबाजी सोपान डोईफोडे यांनी १३ जून ला सोयाबीनची लागवड केली होती. ही सोयाबीन काढून बाजारात विक्रीसाठी आणली. दरम्यान, पाऊस लांबल्याने अनेक शेतकऱ्यांच्या सोयाबीनच्या पिकाला मोठा फटका बसला असून, उत्पादनातही मोठी घट आली आहे.

अनेक शेतकऱ्यांची सोयाबीन काढणे अजूनही बाकी आहे. तर काही ठिकाणी सोयाबीनची काढणी सुरू आहे. घरात सोयाबीन न ठेवता शेतकरी मिळेल त्या भावाने विक्रीसाठी लगेच बाजारात घेऊन येत आहेत. येथील व्यापारी अविनाश शिंदे यांच्या दुकानात बुधवारी नव्या सोयाबीनचे खरेदीला सुरुवात झाली.

या वेळी बाजार समितीच्या वतीने शेतकरी लिंबाजी डोईफोडे यांचा हार शाल श्रीफळ देऊन सत्कार करण्यात आला. या वेळी बाजार समितीचे केंद्रप्रमुख राहुल गुजर आर. ए. शिंदे विलास गाढे दत्ता बिलोरे यांच्यासह शेतकऱ्यांची उपस्थिती होती. दरम्यान, बुधवारीही (ता. २७) बाजारात जवळपास १५ क्विंटल सोयाबीनची आवक झाली होती. तर दर ४७०० रुपये प्रतिक्विंटल स्थिर होता.