Sangli News: राज्यातील मृग बहारातील डाळिंब विक्री अंतिम टप्प्यात आली आहे. गेल्या महिन्याभरात डाळिंबाचे दर टिकून आहेत. सध्या दर्जेदार डाळिंबाला प्रति किलो १५० ते १८० रुपये असा दर आहे. यंदाच्या हंगामात डाळिंबाचे दर चांगले राहिले. त्यामुळे डाळिंबाची दरामुळे गोडी वाढली असून शेतकऱ्यांना मोठा दिसाला मिळाला आहे.

राज्यात यंदा मृग बहारात ४५ हजार हेक्टरवरील डाळिंबाच्या बागा साधल्या. सद्यःस्थितीला अंदाजे १५ टक्के म्हणजे साडेसहा हजार हेक्टरवरील डाळिंबाची विक्री बाकी आहे. बाजारात डाळिंबाची मागणीही चांगली असून उठावही होत आहे. सध्या हंगाम अंतिम टप्प्याकडे आला असल्याने बाजारात डाळिंबाची आवक कमी अधिक होत आहे. त्यामुळे दरही चांगले राहिले आहेत.

हंगामाच्या सुरुवातीला डाळिंबाला प्रति किलो १०० रुपये असे दर होते. या दरम्यान, डाळिंबाची आवक कमी असून मागणीही कमी होती. त्यामुळे डाळिंबाचे दर दबावात होतो. त्यानंतर डाळिंबाच्या दरात वाढ झाली. मात्र, नोव्हेंबर महिन्यात परराज्यातील डाळिंब राज्यभरातील डाळिंब बाजारपेठेत विक्रीला दाखल झाली. परिणामी पुन्हा डाळिंबाचे दर चाळीस टक्क्यांनी घसरले. या दरम्यान, डाळिंब उत्पादक शेतकऱ्यांना काहीसा आर्थिक फटका बसला.

डिसेंबर परराज्यातील डाळिंबाची आवक मंदावली. बाजारपेठेत डाळिंबाची मागणी वाढली. त्यामुळे डाळिंबाच्या दरात पुन्हा वाढ झाली. या दरम्यान, डाळिंबाला प्रति किलोस १३० ते १८० रुपये असा दर मिळाला. गेल्या महिन्याभरापासून डाळिंबाचे दर टिकून आहेत. दर्जेदार डाळिंबाला प्रति किलोस १५० ते १८० असा दर आहे. नैसर्गिक आपत्तीचा फटका डाळिंब पिकाला बसला असला तरी, डाळिंबाचे दर टिकून राहिल्याने डाळिंब शेतकऱ्यांमध्ये समाधानाचे वातावरण आहे.

गतवर्षीच्या तुलनेत दर चांगले

गतवर्षी मृग बहरातील डाळिंबाचे दर कमी अधिक झाले होते. त्यामुळे काही अंशी डाळिंब उत्पादक शेतकऱ्यांनी डाळिंब विक्रीचे नियोजन बाजारपेठेतील दरानुसार केले. गतवर्षीही परराज्यातील डाळिंबाच्या आवकेचा फटका राज्यातील डाळिंबाला बसला होता. परिणामी डाळिंबाचे दरही कमी झाले होते. वास्तविक पाहता, गतवर्षीच्या तुलनेत यंदाच्या हंगामात डाळिंबाच्या दरात १५ ते २० रुपयांनी दर चढे राहिले आहेत.