Nanded News : तूर उत्पादकांना शासनाच्या किमान हमी दरानुसार खरेदी केंद्रावर तुरीची विक्री करण्यासाठी पेऱ्याची अडचण येत होती. या बाबत राज्याच्या पणन विभागाने शेतकऱ्यांना काही अंशी दिलासा दिला आहे.

सोयाबीन, उडीद, मूग या पिकासोबत तुरीचा पेरा नोंदलेल्यांना या पिकाचे संपूर्ण क्षेत्र तर कपाशी सोबत तुरीचा पेरा नोंदलेल्यांना या पिकाच्या अर्धे क्षेत्र तूर नोंदणीसाठी ग्राह्य धरण्याचे निर्देश दिले आहेत. या निर्णयामुळे केवळ आंतरपीक म्हणून तुरीची नोंदणी केलेल्या शेतकऱ्यांना दिलासा मिळाला आहे.

केंद्र शासनाच्या किमान हमी दरानुसार शेतकऱ्यांना शासनाच्या केंद्रावर तुरीची विक्री करण्यासाठी सातबारावर तुरीचा ऑनलाइन पेरा नोंदणे आवश्यक आहे. परंतु अनेक शेतकऱ्यांच्या सातबारावर तुरीची नोंद नसल्यामुळे हजारो शेतकरी तूर विक्रीपासून वंचित राहण्याची शक्यता आहे. या बाबत ‘ॲग्रोवन’ने ‘पेरा नोंदणी अभावी शासकीय तूर खरेदी रखडली’ या मथळ्याखाली बातमी दोन मार्च रोजी प्रकाशित केली होती.

या बाबत राज्य शासनाच्या सहकार, पणन व वस्त्रोद्योग विभागाच्या अवर सचिव संगीता शेळके यांनी बुधवारी (ता. ५) परिपत्रक जारी केले आहे. यात हंगाम २०२४-२०२५ मधील हमी दराने तूर खरेदी संदर्भात त्यांनी महाराष्ट्र राज्य सहकारी पणन महासंघाचे व्यवस्थापकीय संचालक, ‘नाफेड’चे राज्य प्रमुख, एनसीसीएफचे शाखा प्रमुख तसेच एनईएमएलच्या व्यवस्थापकांना त्यांना तुरीच्या पेरा संदर्भात सूचना केली आहे.

तुरीचे पीक आंतरपीक म्हणून घेण्यात येते. सध्या सुरू असलेल्या तूर खरेदीसाठी मूग, उडीद व सोयाबीन पिकासोबत आंतरपीक म्हणून घेतलेल्या तुरीच्या लागवडीखालील संपूर्ण क्षेत्र (शंभर टक्के) आणि कापूस पिकांसोबत तुरीचे आंतरपीक घेतले असल्यास कापूस व तुरीसाठी अर्धे-अर्धे (५०:५०) टक्के क्षेत्र ग्राह्य धरुन उत्पादकता निश्‍चित करावी व त्याप्रमाणे खरेदी करण्यात यावी, असे निर्देश दिले आहेत.

या निर्णयामुळे सोयाबीन, मुग, उडीद या पिकासोबत तुरीचा पेरा नोंदविलेल्या शेतकऱ्यांना तुरीचा संपूर्ण क्षेत्राचा पेरा ग्राह्य धरुन विक्रीपूर्व नोंदणी करता येईल. तर कपाशीसोबत तुरीचा पेरा लावलेल्या शेतकऱ्यांना कपाशीच्या क्षेत्राच्या तुलनेत अर्धे क्षेत्र ग्राह्य धरुन पेरा नोंदविता येणार आहे.