Jalgaon News : खानदेशात पपई दरांचा तिढा तयार झाला आहे. शेतकऱ्यांनी थेट खरेदीसंबंधी खरेदीदारांनी दिलेला १५ रुपये प्रतिकिलोचा दर अमान्य केला आहे. किमान २१ ते २२ रुपये प्रतिकिलोचा दर शेतकऱ्यांना जागेवर हवा आहे.

पपईचा काढणी हंगाम खानदेशात या महिन्यात जोमात सुरू झाला आहे. यंदा विषम वातावरण व इतर समस्यांमुळे उत्पादन कमी आहे. रोपांच्या टंचाईमुळे पपईची लागवड मे महिन्यात उशिरा झाली आहे. यामुळे आवकही कमी आहे. दुसरीकडे खरेदीदारांकडून दर पाडण्याचे प्रकार सुरू आहेत.

मध्यंतरी शेतकऱ्यांनी सुमारे १५ रुपये प्रतिकिलोचा दर जागेवर मान्य केल्याचे बनावट पत्र समाज माध्यमांत व्हायरल झाले. यास शेतकऱ्यांनी विरोध केला. हा खोडसाळपणा कुणीही करू नये, १५ रुपये दर अमान्यच आहे. पपईचा उत्पादन खर्च यंदा वाढला आहे. जागेवर २१ ते २२ रुपये प्रतिकिलोचा दर हवा, अशी मागणी शेतकऱ्यांनी लावून धरली आहे.

खानदेशातील पपईला उत्तर भारतात मोठी मागणी आहे. उठाव वाढला आहे. अशात खरेदीदारांनी दर पाडण्याचा प्रकार सुरू केल्याने शेतकऱ्यांनी नाराजी व्यक्त केली आहे. मध्यंतरी दर ३० ते ३५ रुपये प्रतिकिलो देखील होते.

त्यात काही दिवसांत मोठी घट कशी शक्य आहे, असा प्रश्नही पपई उत्पादकांनी उपस्थित केला. यात प्रशासन, जिल्हा उपनिबंधक कार्यालयांनी लक्ष घालून कार्यवाही करावी, अशी अपेक्षा विविध फळ बागायतदार संघ, शेतकरी गटांनी केली आहे.

पपईची काढणी ठप्प

मध्यंतरी शहादा (जि.नंदुरबार) येथील पपई उत्पादकांनी खरेदीदार, व्यापाऱ्यांशी दरांबाबत चर्चा केली. परंतु दरांचा तिढा कायम आहे. यासंबंधी तोडगा निघत नसल्याने शेतकऱ्यांनी पपईची काढणी बंद ठेवली आहे.

कुण्याही खरेदीदारास १५ रुपये प्रतिकिलो दरात पपईची विक्री करू नका, अशा सूचना विविध संघटना, शेतकऱ्यांनी केल्या आहेत. यामुळे पपईची काढणी खानदेशात ठप्प असल्याची माहिती मिळाली.