जळगाव ः खानदेशात मागील हंगामाच्या तुलनेत केळीची (Banana)आवक कमी आहे. पण बिहार, गुजरात व मध्य प्रदेशातील केळीची उत्तर भारतातील बाजारातील (Market) आवक वाढली आहे. तसेच सफरचंद व इतर फळांचे दरही बाजारात आवाक्यात असल्याने केळी दरांवर सतत दबाव वाढला आहे. दर्जेदार केळीचे दर खानदेशात ३००० रुपयांवरून १५०० रुपयांवर खाली आले आहेत.

खानदेशात कमी दर्जाच्या केळीला ८००, ९००, १००० रुपये प्रतिक्विंटलचा दर आहे. कमी दरांचा प्रश्‍नही मागील काही दिवसांत ऐरणीवर आला आहे. आपल्या केळीची व्यापारी किंवा खरेदीदार कमी दरात खरेदी करीत असल्याच्या तक्रारी जळगाव, नंदुरबार जिल्ह्यांतील शेतकरी करीत आहेत. खानदेशात मागील हंगामात ऑगस्टमध्ये प्रतिदिन सरासरी ४६५ ट्रक (एक ट्रक १६ टन क्षमता) केळीची आवक होती. दरही १२०० ते १३०० रुपये प्रतिक्विंटल, असे होते. यंदा या महिन्यातील आवक प्रतिदिन सरासरी ३७५ ट्रक आहे. परंतु आवक कमी असताना खानदेशात केळीच्या दरांवर महिनाभरात सतत दबाव वाढला आहे. खानदेशातील केळीला उत्तर भारतात मोठा उठाव असतो. पण देशात गुजरातमधील राजपिपला व परिसर, मध्य प्रदेशातील बऱ्हाणपूर, बडवानी आणि बिहारमधूनही केळीची आवक सुरू झाली आहे. या भागातूनही याच महिन्यात केळीची आवक वाढली आहे. परिणामी, उत्तरेकडे म्हणजेच पंजाब, उत्तर प्रदेश, दिल्ली, काश्मीर येथे खानदेशातील केळीचा उठाव कमी आहे. कारण खानदेशातून उत्तरेकडे केळी पोहोचविण्यासाठी इतर राज्यांच्या तुलनेत अधिकचा खर्च व वेळ लागतो. मध्य प्रदेशातील बऱ्हाणपूर जिल्ह्यात सुमारे ३१ हजार हेक्टरवर मागील हंगामात लागवड झाली होती. या क्षेत्रात काढणीला याच महिन्यात वेग आला आहे. बऱ्हाणपूर येथील बाजारात मागील १५ दिवसांपासून प्रतिदिन सरासरी २०० ट्रक केळीची आवक झाली आहे. तेथील बाजारात केळीचे रोज लिलाव होत आहेत. तेथेही कमाल दर १५०० रुपये प्रतिक्विंटल, तर किमान दर १००० रुपये असा मिळत आहे, अशी माहिती मिळाली.

सणासुदीमुळे दरातील घसरण थांबणार
देशात विविध भागांत केळीची काढणी, आवक सुरू झाली आहे. परंतु पुढे गणेशोत्सव, पितृपक्ष, नवरात्रोत्सव आदी सणासुदीचे दिवस आहेत. यामुळे देशात केळीची मागणी टिकून राहील. दरातील घसरणही थांबेल, असा अंदाज जाणकार व्यक्त करीत आहेत.