Pune News: राज्यातील वखार महामंडाळाची गोदामे आधीच सोयाबीनने फुल झाली आहेत. त्यामुळे तूर कुठे साठवायची हा प्रश्न सरकारपुढे होता. त्यामुळेच राज्यात तुरीची खरेदी सुरु होण्यास उशीर झाला. पण आता वखार महामंडळाने राज्यातील खासगी गोदामे भाड्याने घेऊन तूर साठवण्याचा निर्णय घेतला. त्यामुळे तूर खरेदीतील महत्वाचा प्रश्न निकाली निघाला आहे.

राज्यात यंदा सोयाबीनची खरेदी ६ फेब्रुवारीपर्यंत चालली. पण सोयाबीनची खरेदी अपेक्षेपेक्षा जास्त झाल्याने सरकारचे साठवणुकीचे नियोजन बिघडले होते. त्यामुळे तुरीची खरेदी कधी सुरु करायची आणि तूर खुठे साठवायची? हा प्रश्न होता. राज्यात वखार महामंडळाच्या गोदामांची एकूण साठवण क्षमता १८ लाख टन आहे.

पण सोयाबीनचीच खरेदी ११ लाख २१ हजार टन झाली. सोयाबीन खरेदीची मुदत संपल्यानंतरही या गोदामांमध्ये सोयाबीन साठवण्यासाठी आठवडाभर खरेदी केंद्रांना वाट पाहावी लागली. खरेदी केंद्रांच्या गोदामांमध्येही सोयाबीन पडून होती. त्यामुळे तूर खरेदीचा प्रश्न निर्माण झाला.

दरवर्षी फेब्रुवारीच्या सुरुवातीला सुरु होणारी तूर खरेदी यंदा दोन आठवड्याने उशीरा सुरु झाली. त्याचे मुख्य कारण गोदामांची टंचाई हेच होते. पण तुरीचा बाजार कोसळल्याने सरकारला तूर खरेदी तातडीने सुरु करणे गरजेचे होते. त्यामुळे वखार महामंडळाने जिल्हानिहाय खासगे गोदामे भाड्याने घेतली.

या गोदामांमध्ये २ लाख ९७ हजार टन तूर साठवण्याचे नियोजन केल्याचे वखार महामंडळाचे म्हणणे आहे. तूर पट्ट्यात खेरदी जास्त होणार आहे. नागपूर, अमरावती, छत्रपती संभाजीनगर, लातूर विभागात खरेदी जास्त होणार आहे. पण सर्वच जिल्ह्यांमध्ये साठवणुकीचा प्रश्न निकाली निघाला असेही म्हणता येणार नाही. तूर खरेदी जशी वाढेल तसे साठवणुकीचा प्रश्न निर्माण होऊ शकतो, असे खरेदी केंद्र चालकांनी सांगितले.

राज्य सरकारने १३ फेब्रुवारीपासून तूर खरेदीला परवानगी दिली. राज्यात ३१५ खरेदी केंद्रांना मंजुरी देण्यात आली. पण खरेदीला अजून वेग आलेला नाही. मार्च महिन्यात तुरीच्या खेरदीला वेग येऊ शकतो. त्यावेळी साठवणुकीची समस्या आली नाही तर यंदा चांगली तूर खरेदी होऊ शकते, असेही काही केंद्र चालकांनी सांगितले.