Market Bulletin:

सोयाबीनमध्ये चढ उतार

सोयाबीनचा बाजार देशात स्थिर आहे. तर आंतरराष्ट्रीय बाजारात काही प्रमाणात चढ उतार सुरु आहेत. देशातील सोयाबीनची भावपातळी आजही ३ हजार ८०० ते ४ हजार १०० रुपयांच्या दरम्यान होती.

तर प्रक्रिया प्लांट्सचे भाव ४ हजार ३५० ते ४ हजार ४५० रुपयांच्या दरम्यान होते. आंतरराष्ट्रीय बाजारात सोयाबीन आणि सोयापेंडच्या भावात आजही चढ उतार सुरुच होते. सोयाबीनचे वायदे आज काहीसे वाढून १०.५० डाॅलर प्रतिबुशेल्सवर पोचले होते. तर सोयापेंड ३०१ डाॅलर प्रतिटनांवर होते. देशातील बाजारात सोयाबीनची आवक चांगली आहे. ही आवक आणखी काही आठवडे कायम राहू शकते, असा अंदाज अभ्यासकांनी व्यक्त केला.

कांदा भाव टिकून

मागील काही दिवसांमध्ये कांद्याच्या भावात पुन्हा चढ उतार पाहायला मिळाले. मागील आठवड्यात कांदा भाव १६०० रुपयांच्या दरम्यान पोचले होते. पण मागील दोन दिवसांपासून कांद्याच्या भावात पुन्हा सुधारणा पाहायला मिळाली. दर कमी झाल्यानंतर बाजारातील आवकही काहीशी कमी होत असल्याचे व्यापाऱ्यांनी सांगितले.

त्यामुळे पुन्हा दरात काहीशी सुधारणा पाहायला मिळाली. कांद्याला उठावही चांगला आहे. त्यामुळे आज बाजारात कांद्याला सरासरी प्रतिक्विंटल १७०० ते २२०० हजारांच्या दरम्यान मिळाला. बाजारातील आवक पुढील काळात काहीशी सुधारण्याची शक्यता आहे. याचा दरावरही परिणाम दिसू शकतो, असा अंदाज अभ्यासकांनी व्यक्त केला.

लाल मिरची दबावात

देशातील बाजारात लाल मिरचीचा भाव मागील काही आठवड्यांपासून दबावात दिसत आहे. महत्वाच्या लाल मिरची उत्पादक राज्यांमध्ये भाव कमी झाले आहेत. आंध्र प्रदेश, तेलंगणा आणि कर्नाटक या मिरची उत्पादक राज्यांमध्ये नवा माल बाजारात येत आहे. आवकेचा दबाव वाढत असल्याने भावपातळीही कमी झाली.

सध्या बाजारात लाल मिरचीला वाण आणि गुणवत्तेप्रमाणे १३ हजार ते १८ हजार रुपयांचा भाव मिळत आहे. बाजारातील मिरचीची आवक आणखी काही आठवडे कायम राहू शकते, असा अंदाज व्यापारी व्यक्त करत आहेत.

कारल्याला चांगला उठाव

राज्यातील बाजारात सध्या कारल्याला चांगला उठाव मिळत आहे. बाजारातील कारल्याची आवक कमी आहे. बाजारातील इतर भाजीपाल्याच्या दराचाही आधार कारल्याला मिळत आहे. कमी आवक आणि चांगल्या मागणीमुळे कारल्याला भावही चांगला आहे.

सध्या बाजारात कारली प्रतिक्विंटल ३ हजार ते ३ हजार ५०० रुपयांच्या दरम्यान विकले गेले. कारल्याची आवक यापुढील काळातही कमीच राहण्याचा अंदाज आहे, असे व्यापाऱ्यांनी सांगितले.

कापूस दबावातच

देशातील बाजारावर सध्या आंतरराष्ट्रीय बाजारातील मंदी आणि देशातील बाजारात कापसाची आवक या दोन घटकांचा प्रामुख्याने परिणाम दिसून येत आहे. देशातील कापसाचा सरासरी भाव आजही दबावात होता. कापसाला आज सरासरी ६ हजार ८०० ते ७ हजार २०० रुपयांच्या दरम्यान भाव मिळाला.

तर सरकी ३ हजार ४०० ते ३ हजार ६०० रुपायंच्या दरम्यान विकली जात आहे. तर आंतरराष्ट्रीय बाजारात कापसाचे भाव आज दुपारपर्यंत ६८ सेंट प्रतिपाऊंडच्या दरम्यान पोचला होता. कापसाच्या भावात काहीसे चढ उतार दिसू शकतात, असा अंदाज कापूस बाजारातील अभ्यासकांनी व्यक्त केला.