Amaravati News : सुरुवातीला कमी आणि त्यानंतर संततधार पावसाचा फटका बसल्याने लिंबाची उत्पादकता कमी झाली. परिणामी, बाजारात लिंबाची आवक कमी आहे. त्यामुळे दर तेजीत आले असून, सध्या कळमना बाजारात लिंबाला ३५०० ते ४००० रुपये क्‍विंटल दर मिळत आहे.

पावसाळ्यानंतर थंडीला सुरुवात होते. मात्र मधल्या काळात तापमानात वाढ होत असल्याने लिंबाची मागणी वाढते. दरवर्षी मृग बहराची उत्पादकता चांगली होत असल्याने बाजारात मागणीच्या तुलनेत पुरवठा अधिक अशी स्थिती राहते. त्याचा दरावर परिणाम होत ते सरासरी २००० ते ३००० रुपये क्‍विंटल याप्रमाणे राहतात.

सद्यःस्थितीत दिल्लीत ५००० ते ७००० रुपये क्‍विंटलचा दर आहे. नागपूरच्या कळमना बाजारात लिंबू आवक अवघी १५ ते २० क्‍विंटल आहे. त्यामुळेच दर तेजीत आहेत. अमरावतीच्या फळ व भाजीपाला बाजार समितीत लिंबू आवक १० क्‍विंटल राहिली. ठिकाणी दर १८०० ते २००० रुपये इतके आहेत. पुढील काळात उन्हाची तीव्रता वाढल्यानंतर हे दर वाढतील, अशी अपेक्षा व्यापारी सूत्रांकडून वर्तविली जात आहे.

वाडेगाव ( अकोला), माउली (चोर (अमरावती), श्रीगोंदा (नगर), विजापूर (कर्नाटक) या भागांत लिंबू बागा आहेत. त्याच भागातून लिंबाचा पुरवठा होतो. दरम्यान, लिंबू पुरवठादार अंकुश झंझाट म्हणाले, ‘‘हस्त बहरातील फळे मार्च ते जून या कालावधीत मिळतात. या हंगामातील फळांना सर्वाधिक दर मिळतो.

कारण या हंगामातील फळांची उपलब्धता उन्हाळ्यात होते. सरासरी १० हजार रुपये क्‍विंटलपर्यंत दर राहतो. गेल्या हंगामात १५ हजार रुपये क्‍विंटलचा दर मिळाला. या हंगामातील नियोजन करताना १५ नोव्हेंबरपासून बाग फुलधारणेवर येते; त्यानुसार बागेचे व्यवस्थापन करावे लागते. मृगातील फळांना कमी दर मिळतो. यंदा मात्र उत्पादकतेच्या परिणामी या हंगामातील फळांचे दरही तेजीत आले आहेत.