Ratnagiri News : मागील आठवड्यात मच्छीमारांच्या जाळ्यात सलग तीन दिवस मोठ्या प्रमाणात कानट मासा सापडल्यामुळे दिलासा मिळाला; मात्र वेगवान वाऱ्यांमुळे समुद्र खवळल्याने मासळी खोल पाण्यात गेली आहे. ती परतण्यासाठी अजून दोन दिवसांचा कालावधी लागणार आहे.

ऑगस्टमध्ये ट्रॉलिंग, गिलनेटद्वारे मासेमारीला आरंभ झाला. त्यानंतर महिनाभरात शासनाच्या निर्देशानुसार पर्ससिननेट मासेमारी सुरू झाल्यानंतर आरंभीलाच किनाऱ्यापासून २० ते २२ वाव खोल समुद्रात जाळ्यात कानट मासा मिळू लागला. दरवर्षी सुरुवातीच्या कालावधीत हा मासा मिळतो. साधारपणे ४ सप्टेंबरपासून हा मासा सापडण्यास सुरुवात झाली होती. पुढे सलग तीन दिवस नौकांना कानट मासा मिळत होता.

फिशमिल कंपन्यांमध्ये सुरुवातीला किलोला २२ रुपये दर मिळाला. पुरवठा वाढल्यामुळे हा दर निम्म्यावर आला. सध्या दहा ते बारा रुपये किलोने फिशमिल कंपनीत हा मासा विकत घेतला जात आहे. या माशांवर प्रक्रिया करून त्यापासून बनवलेले ऑईल किंवा पावडर निर्यात केली जाते. त्याला परदेशामध्ये मागणी आहे.

दरम्यान, फिशमिल कंपन्यांच्या क्षमतेपेक्षा अधिक मासा प्रक्रियेसाठी येऊ लागला. त्यानंतर काही कालावधीतच कंपन्यांनी खरेदी बंद केली होती. तीन दिवसांनंतर कानट मिळण्याचा ओघ कमी झाला आहे.

सध्या पाचशे ते हजार किलोपर्यंतच मासा मिळत आहे. त्यामुळे कंपन्यांची खरेदीही सुरू झाली आहे; परंतु ८ सप्टेंबरला वेगवान वाऱ्यांसह पाऊस सुरू झाला आणि मासेमारी थांबली. सोमवारपासून (ता. ११) मच्छीमार समुद्रात जाऊ लागले आहेत. पण अपेक्षित मासे जाळ्यात सापडत नसल्यामुळे मच्छीमारांची निराशा होत आहे.