सोलापूर ः सोलापूर कृषी उत्पन्न बाजार समितीच्या (Solapur APMC) आवारात गतसप्ताहात कोथिंबीर, मेथी, शेपूसह हिरव्या मिरचीला चांगला उठाव (Green Chili Demand) मिळाला, शिवाय मागणीतील सातत्यामुळे दरातही (Vegetable Rate) चांगलीच सुधारणा झाल्याचे बाजार समितीच्या सूत्रांकडून सांगण्यात आले.

बाजार समितीच्या आवारात गतसप्ताहात कोथिंबिरी, मेथी आणि शेपूची रोज आठ ते दहा हजार पेंढ्यापर्यंत आवक राहिली. शिवाय भाज्यांना मागणीही चांगली आहे. भाज्यांची आवक स्थानिक भागातूनच राहिली. गेल्या पंधरवड्यापासून भाज्यांना चांगला उठाव मिळतो आहे. परिणामी दरात सुधारणा होते आहे.

कोथिंबिरीला शंभर पेंढ्यांसाठी १५०० रुपये, सरासरी २००० रुपये आणि सर्वाधिक ३००० रुपये, मेथीला किमान ९०० रुपये, सरासरी १२०० रुपये आणि सर्वाधिक २००० रुपये तर शेपूला किमान ७०० रुपये, सरासरी १००० रुपये आणि सर्वाधिक १५०० रुपये असा दर मिळाला. त्याशिवाय हिरव्या मिरचीलाही पुन्हा एकदा चांगला उठाव मिळाला, तिचे दरही तेजीत राहिले.

हिरव्या मिरचीची रोज ४० ते ५० क्विंटलपर्यंत आवक राहिली. हिरव्या मिरचीला प्रतिक्विंटलला किमान १८०० रुपये, सरासरी २५०० रुपये आणि सर्वाधिक ३५०० रुपये असा दर मिळाला. कांदा दरात या सप्ताहात मात्र जैसे थे स्थिती राहिली. कांद्याची आवक रोज ८० ते १०० गाड्यांपर्यंत राहिली. कांद्याला प्रतिक्विंटलला किमान २०० रुपये, सरासरी ९०० रुपये आणि सर्वाधिक १८०० रुपये असा दर मिळाल्याचे सांगण्यात आले.

डाळिंबाला पुन्हा उठाव

डाळिंब बाजारात गेल्या काही दिवसात सातत्याने तेजीचे वातावरण आहे. मूळात आवक कमी असल्याने दर वधारल्याचे व्यापाऱ्यांनी सांगितले. डाळिंबाची आवक सांगोला, मंगळवेढा, मोहोळ, पंढरपूर या स्थानिक भागातूनच झाली. डाळिंबाची साधारण रोज एक ते दोन टनापर्यंत आवक राहिली. डाळिंबाला प्रतिक्विंटलला किमान १००० रुपये, सरासरी ४००० रुपये आणि सर्वाधिक १८ हजार रुपयांपर्यंत दर मिळाल्याचे सांगण्यात आले.