Akola News: स्थानिक बाजारात दर्जेदार केळीला भाव मिळत नसल्याने संघर्ष करीत असलेल्या शेतकऱ्यांनी आता निर्यातदारांच्या माध्यमातून आपला माल विदेशात पाठवणे सुरू केले आहे. मंगळवारी (ता. ८) तेल्हारा तालुक्यातील हिंगणी येथील शेतकऱ्याची २० टन वजनाची गाडी निर्यातदाराने इराणसाठी रवाना केली.

अकोला जिल्ह्यात दर्जेदार केळी पिकवूनही स्थानिक व्यापारी दर पाडून खरेदी करतात. गेल्या आठवड्यात केळी उत्पादकांनी बोर्डाच्या दरांसाठी संबंधितांसमवेत चर्चाही घडवून आणली. आता त्यापुढे पाऊल टाकत एका निर्यातदार कंपनीच्या माध्यमातून आपल्या केळीची विदेशात विक्री सुरू केली.

मंगळवारी (ता. ८) पहिल्या गाडीची रवानगी झाली यानिमित्ताने केळी उत्पादकांसाठी मार्गदर्शन कार्यक्रम झाला. या वेळी जिल्हा अधीक्षक कृषी अधिकारी शंकर किरवे, तालुका कृषी अधिकारी श्री. बुरांडे, मंडळ कृषी अधिकारी गौरव राऊत, केळी उत्पादक शेतकरी संघाचे राज्य समन्वयक सचिन कोरडे, जिल्हाध्यक्ष अनंता पाटील इंगळे, जिल्हा कार्याध्यक्ष सुभाष रौंदळे, केळी निर्यात करणाऱ्या कंपनीचे प्रतिनिधी अजिंक्य ताकीक, रोहित मोहिते, सागर जाधव, दीपक मांगुले व हनुमंत खबाले उपस्थित होते.

यावेळी श्री. किरवे व सचिन कोरडे यांनी शेतकऱ्यांना केळीचा दर्जा, पॅकेजिंग, निर्यात प्रक्रियेसंदर्भात मार्गदर्शन केले. शेतकरी शंकर अनंतराव कोरडे यांनी उत्पादित केलेल्या केळीची इराण देशात यशस्वी निर्यात होत असल्याबद्दल त्यांचा सत्कार करण्यात आला. कार्यक्रमाला परिसरातील शेतकरी गणेश कोरडे, दीपक कोरडे, सुधाकर कोरडे, पप्पू नराजे, रामा जोध, सचिन जोध, गोटू कोरडे, यश नराजे, रमेश नराजे, दीपक जोध, मंगेश कोरडे, वैभव कोरडे, उमेश कोरडे, गोपाल राऊत, अंकुश दांदळे, वैभव लाहोळे, शैलेश विखे, स्वप्नील महल्ले यांची उपस्थिती होती.

दर्जानुसार १८०० रुपयांपर्यंत दर मिळण्याचा विश्‍वास

संबंधित निर्यातदारांनी मंगळवारी (ता. ८) पहिली गाडी भरली. आता दररोज या भागातून केळीच्या किमान दोन गाड्या इराणला पाठवण्याच्या उद्देशाने भरल्या जाणार आहेत. स्थानिक भागातील केळी निर्यात होऊ लागल्याने दर्जानुसार कमाल १८०० रुपयांपर्यंत दर मिळतील, असा विश्वास श्री. कोरडे यांनी व्यक्त केला.