Sangli News : येथील कृषी उत्पन्न बाजार समितीमध्ये यंदाच्या हंगामातील नव्या बेदाणा सौद्याला प्रारंभ शुक्रवारी (ता. ३१) झाला. या वेळी बेदाण्याची ३० टन आवक झाली असून, त्यापैकी नवीन बेदाणा १० टन असल्याची माहिती व्यापाऱ्यांनी दिली.

नव्या बेदाण्यास प्रति किलो १८० ते २२५ रुपये असा दर मिळाला. बेदाण्याचे दर १४० ते २१५ रुपये असा दर आहे. फेब्रुवारीच्या मध्यापासून नवीन बेदाण्याची आवक वाढेल आणि बेदाण्याचे दरही वाढतील, असा अंदाज व्यापारी वर्गाने व्यक्त केला आहे.

सध्या बेदाणा निर्मितीचा हंगाम सुरू झाला आहे. द्राक्षाची विक्री करून राहिलेल्या मालापासून बेदाणा तयार होऊ लागला आहे. त्यामुळे तयार झालेला बेदाणा विक्रीस आला आहे. बाजार समिती नवीन बेदाणा सौदा प्रारंभ बाजार समितीचे सभापती सुजय शिंदे यांच्या हस्ते करण्यात आला. बेदाणा सौद्यात हिरव्या बेदाण्याला २२५, तर पिवळ्या बेदाण्यास १९१ रुपये प्रति किलो असा दर मिळाला. वास्तविक पाहता, गेल्या महिन्यात दीड महिन्यापासून बेदाण्याचे दर टिकून आहेत.

फेब्रुवारी मध्यापासून गती देणार

बेदाणा शेडची दुरुस्ती आणि डागडुजी पूर्ण झाली आहे. सध्या द्राक्ष विक्रीचा हंगाम सुरू आहे. त्यामुळे द्राक्ष विक्री करून झालेल्या मालापासून बेदाणा तयार करण्यासाठी शेतकरी पुढे येत आहेत.

यामुळे कवठेमहांकाळ तालुक्यातील नागज आणि सांगोला तालुक्यातील जुनोनी भागांमध्ये बेदाणा तयार करण्यासाठी शेतकरी येऊ लागले आहेत. प्रामुख्याने थॉमसन या वाणाचा बेदाणा अधिक केला जातो. त्यानंतर तास-ए- गणेश, माणिक चमन, क्‍लोन टू, सोनाका या द्राक्षाच्या वाणापासून बेदाणा तयार केला जातो. त्यामुळे या वाणापासून बेदाणा तयार करण्यासाठी फेब्रुवारीच्या मध्यापासून लगबग सुरू होईल.

बेदाणा दर (प्रति किलो)

हिरवा बेदाणा : १८० ते २२५ रुपये

मध्यम बेदाणा : १३० ते १७० रुपये

काळा बेदाणा : ६९ ते १०० रुपये

पिवळा बेदाणा : १८० ते १९१ रुपये