Sindhudurg News: सिंधुदुर्ग जिल्ह्यात पर्यटन हंगामाला गती प्राप्त झाल्यामुळे मासळीच्या दरात देखील सुधारणा झाली आहे. पापलेटचा दर प्रति किलो १४०० तर सुरमई ९०० ते १००० रुपयांवर पोहोचला आहे. अन्य मासळीच्या दरात देखील काहीशी सुधारणा झाली आहे. पुढील दीड, दोन महिने मासळीचे दर कायम राहतील, अशी शक्यता आहे.

जिल्ह्यात पर्यटन हंगामाला गती प्राप्त झाली आहे. गेल्या काही दिवसांपासून पर्यटकांचा ओढा जिल्ह्यात वाढला आहे. पर्यटन हंगाम सुरू झाल्यानंतर जिल्ह्यात मासळीच्या दरात दरवर्षी सुधारणा होते. परंतु या वर्षी पर्यटन हंगाम सुरू झाल्यानंतर मासळी मिळण्याचे प्रमाण कमी झाल्याचे चित्र आहे.

त्यामुळे मासळीच्या दरात सुधारणा झाली आहे. जिल्ह्यात सध्या पापलेट प्रतिकिलो १४०० रुपये, सुरमई ९०० ते १००० रुपये, बांगडा २०० रुपये, लहान कोळंबी ४०० ते ५००, मोठी कोळंबी ६०० ते ७००, सौंदळा ४०० रुपये, मोरी ६०० रुपये, मांदेली १०० ते २०० रुपये असे दर आहेत.

पर्यटन हंगाम मे अखेरीपर्यंत चालतो. १० एप्रिल ते २० मे या कालावधीत पर्यटकांची मोठी गर्दी जिल्ह्यात असते. या कालावधीत मासळीचे दर आणखी वाढण्याची शक्यता आहे. सध्या मासळी मिळण्याचे प्रमाण कमी असल्यामुळे दरात सुधारणा झाली आहे. राज्यातील शाळा, महाविद्यालयांना उन्हाळ्याची सुट्टी लागल्यानंतर पर्यटकांचा ओघ जिल्ह्यांमध्ये दरवर्षी वाढत असतो.