Jalgaon News: खानदेशातून आखातात किंवा परदेशात केळी निर्यातीला मागील महिन्यात सुरुवात झाली आहे. सध्या रोज १५ कंटेनर (एक कंटेनर २० टन क्षमता) केळीची निर्यात सुरू आहे. निर्यातीच्या केळीला कमाल २२०० रुपये प्रति क्विंटलचा दर जागेवर शेतकऱ्यांना मिळत आहे.

शेतातच निर्यातीसंबंधी स्वच्छता, प्रतवारी, पॅकिंग आदी कार्यवाही केली जात आहे. केळी निर्यातीच्या कार्यवाहीसाठी काही बड्या कंपन्या खानदेशात केळीची खरेदी करीत आहेत. या कंपन्यांनी पश्‍चिम बंगालमधील सुमारे साडेचार हजार मजूर केळी पॅकिंग, काढणीच्या कार्यवाहीसाठी उपलब्ध केले आहेत.

गेल्या वर्षी केळी निर्यातीला कुशल मजूर उपलब्ध होत नव्हते. तसेच वाहतुकीसंबंधी देखील अडचणी होत्या, निर्यात रखडत सुरू होती. यंदा खानदेशातून सुमारे दोन हजार कंटेनर मार्च ते जून या कालावधीत आखातात निर्यात होण्याची अपेक्षा आहे. त्याची सुरुवात झाली असून, सध्या रोज १५ कंटेनर केळीची निर्यात होत आहे.

पुढे निर्यात वाढेल. यात तीन ते चार कंटेनर रोज शहादा तालुक्यातून एका कंपनीच्या मदतीने आखातात पाठविले जात आहेत. तर जळगाव जिल्ह्यातून रोज सहा ते सात कंटेनर केळीची निर्यात आखातात होत आहे. सावदा (ता. रावेर), तांदलवाडी (ता. रावेर) येथील केळी पॅक हाउसची मदत केळी निर्यातदार कंपन्यांना केळी पॅकिंग व इतर कार्यवाहीसाठी होत आहे.

निर्यातीच्या केळीला कमाल २२०० रुपये प्रति क्विंटलचा दर मिळत आहे. चोपडा, यावल, रावेरात अधिकची निर्यातक्षम केळी उपलब्ध होत आहेत. धुळ्यातील शिरपुरातही निर्यातक्षम केळी अधिक आहेत. सुमारे १२ केळी खरेदीदार कंपन्या खानदेशात केळी खरेदी करीत आहेत. यामुळे केळी दरांवरील दबाव दूर झाला आहे. सध्या आंध्र प्रदेशातही केळी उपलब्ध नाही. यामुळे दिल्ली, पंजाब, काश्मीर आदी भागांतूनही खानदेशातील केळीला उठाव आहे.