Ethanol Production : देशात पेट्रोलमध्ये १२ टक्के इथेनॉल मिश्रणाकडे वाटचाल सुरू आहे. तेल विपणन कंपन्यांना करार केलेल्या ५१४ कोटी लिटरपैकी २३३ कोटी लिटर इथेनॉलची प्राप्ती ३० एप्रिल अखेर झाली आहे.

गेल्या वर्षी याच कालावधीत १० टक्के इथेनॉल मिश्रण होत होते. हे प्रमाण आता ११.६५ टक्के पर्यंत गेले आहे. केंद्रीय पेट्रोलियम मंत्रालयाच्‍या सूत्रांनी ही माहिती दिली. केंद्र शासनाने गेल्‍या दोन वर्षांपासून इथेनॉल निर्मितीवर जोर दिला आहे. सध्‍या इथेनॉल निर्मितीचा भार साखर उद्योगावर आहे.

साखर कारखान्यांनी जास्तीत जास्‍त प्रमाणात इथेनॉल निर्मितीकडे वळावे यासाठी जोरदार प्रयत्न सुरू केले आहेत. फक्त साखर उद्योगावर अवलंबून न राहता केंद्राने अलीकडच्या काही महिन्यात धान्यावर आधारित प्रकल्प सुरू करण्‍यासाठीही चाचपणी केली. विशेष करून येथून पुढील काळात मक्या सारख्या पिकांपासून इथेनॉल निर्मिती व्‍हावी यासाठी विविध उपाययोजना आखल्‍या जात आहेत.

२०२५ पर्यंत २० टक्के इथेनॉल मिश्रणाचे उद्दिष्ट साध्‍य करण्यासाठी केंद्रीय पातळीवरून जोरदार हालचाली सुरू आहेत. सरकारने देशात इथेनॉलचे उत्पादन आणि वापरास प्रोत्साहन देण्यासाठी विविध उपक्रम आणि उपाययोजना जाहीर केल्या आहेत, ज्यात इथेनॉल पुरवठा साखळीचा विस्तार, इथेनॉल प्रकल्पांची संख्या वाढवणे आणि फ्लेक्स-इंधन वाहनांचा वापर आदींचा समावेश आहे.

तेल उत्पादक कंपन्यांनी साखर-आधारित डिस्टिलरीजमधून ३७४ कोटी लिटर इथेनॉलची खरेदी करण्याबरोबर १४० कोटी लिटर धान्य-आधारित प्रकल्‍पांकडून खरेदी करण्याचा करार केला आहे. उसाच्या रसापासून बनवलेल्या इथेनॉलचे १३८ कोटी लिटर तर बी हेवी मोलॅसिस पासून २३० कोटी लिटर इथेनॉल पुरवठ्याचे करार झाले आहेत.

सध्या देशातील साखर हंगाम अंतिम टप्प्यात आला आहे. यामुळे येथून पुढे ऑक्टोबर पर्यंत इथेनॉल निर्मितीचा भर धान्यावरच असणार आहे. पुढील हंगाम सुरू होईपर्यंत केवळ मळीपासून इथेनॉल उत्पादन होवू शकणार आहे. इथेनॉल निर्मितीची गती कमी होवू नये या साठी केंद्राने धान्य आधारित प्रकल्पांना मान्यता देण्याचा वेगही वाढवला असल्याचे केंद्रीय सूत्रांनी सांगितले.