Jalgaon News : देशातील बाजारांत सध्या रोज ३० ते ३२ हजार क्विंटल कापसाची आवक होत आहे. ही आवक मागील हंगामाच्या तुलनेत कमी आहे. आवक कमी असल्याने दरात सुधारणा दिसत असल्याचे जाणकारांचे मत आहे.

मागील वर्षी देशात ऑक्टोबरच्या सुरुवातीला रोज सहा ते सात हजार गाठींच्या कापसाची आवक होत होती. यंदा मात्र ही आवक कमी आहे. कारण यंदा कापूस लागवड उत्तरेकडे घटली आहे. सध्या उत्तरेकडेच कापसाची आवक आहे. राज्यासह गुजरात, मध्य प्रदेशात अलीकडेच कापूस वेचणी सुरू झाली आहे. यामुळे कापूस आवक कमी आहे. आवक कमी असल्याने दरात फारशी घट दिसत नसल्याचे चित्र आहे. पुढील सात ते आठ दिवसांनंतर ५० ते ५५ हजार क्विंटल कापसाची आवक आवक होईल. तर नोव्हेंबरमध्ये आवकेत बऱ्यापैकी वाढ होईल. शेतकऱ्यांकडे कापूससाठा अल्प आहे.

राज्यात खानदेशसह अन्य भागांत अद्याप कापसाची आवक कमी असल्याने कापसाची खेडा खरेदी सुरू झालेली नाही. कापसाचे दर राज्यात किंवा देशात वेगवेगळे आहेत. खानदेशात सध्या दर्जेदार कापसाला प्रतिक्विंटल ८१०० रुपये दर आहे. तर नव्या कापसाची खरेदी ७५०० रुपये प्रतिक्विंटल या दरात केली जात आहे.

शेतकऱ्यांकडील साठा कमी

सध्या देशात कापसाची आवक रखडत सुरू आहे. अर्थात शेतकऱ्यांकडे कापूस अद्याप साठविण्यास सुरुवात झालेली नाही. यंदा कोरडवाहू कापसाचे उत्पादन एकरी ८० किलो ते एक क्विंटल एवढेच येऊ शकते. तसेच अतिपावसात महाराष्ट्र, गुजरात व मध्य प्रदेशात कापसाची हानी झाली आहे.

तेलंगणात उत्पादनात मोठी घट होऊ शकते, असेही संकेत आहेत. देशात एकूण ३१० लाख गाठींचे उत्पादनही शक्य नाही, असेही सांगितले जात आहे. यामुळे शेतकऱ्यांकडील अधिकचा साठा, आवकेने दरांवरील दबाव हा मुद्दा यंदाच्या बाजारासंबंधी फारसा चर्चेत राहणार नाही, असेही जाणकार सांगत आहेत.