Market Bulletin : सोयाबीनच्या भावातील चढ उतार सुरुच आहेत. आंतरराष्ट्रीय बाजारात आज दुपारपर्यंत सोयाबीनचे वायदे वाढून १२.५० डाॅलर प्रतिबुशेल्सवर होते. तर सोयापेंडचे वायदे वाढून ३८८ डाॅलर प्रतिटनांवर होते.

देशातील बाजारातही काही प्रमाणात चढ उतार दिसत असले तरी सरासरी भावपातळी मात्र कायम आहे. देशातील बाजारात सोयाबीनला आजही ४ हजार १०० ते ४ हजार ५०० रुपयांचा भाव मिळाला. ही स्थिती आणखी काही दिवस राहू शकते, असा अंदाज आहे. 

कापसाच्या वायद्यांमध्ये मागील चार दिवसांमध्ये काहीशी सुधारणा झाल्यानंतर आज मात्र वायदे नरमले. आंतरराष्ट्रीय बाजारात आणि देशातही कापसाच्या वायद्यांमध्ये लक्षणीय घट झाली. आंतरराष्ट्रीय वायदे पुन्हा ८० सेंटवर आले.

तर देशातील वायदे ५७ हजार ७७० रुपये प्रतिखंडीवर आले होते. बाजार समित्यांमधील भावापातळी काही प्रमाणात कमी जास्त होत आहे. मात्र सरासरी भाव ७ हजार १०० ते ७ हजार ५०० रुपयांच्या कायम आहे. कापूस बाजारातील चढ उतार दोन ते तीन आठवडे कायम राहू शकतात, असा अंदाज अभ्यासकांनी दिला. 

तुरीची भावपातळी मागील काही आठवड्यांपासून टिकून आहे. तुरीला उठाव मिळत असल्याने भावाला आधार आहे. काही आठवड्यांपुर्वी तुरीच्या भावात आलेली काहीसे नरमाई दूर झाल्याचे दिसत आहे.

देशभरातील बाजारातील सरासरी भाव १० हजार ते ११ हजार रुपयांच्या दरम्यान पोचला. बाजारातील घटती आवक आणि चांगला उठाव यामुळे तुरीच्या बाजारात सुधारणा दिसून आली. तसेच तुरीच्या भावातील तेजी कायम राहील, असाही अंदाज तूर बाजारातील अभ्यासकांनी व्यक्त केला. 

हळदीचे भाव देशातील बाजारांमध्ये टिकून आहेत. हळद बाजारातील तेजी हंगामाच्या आधीपासूनच आहे. यंदा उत्पादन घटले पण हळदीला चांगली मागणी आहे. सध्या हळदीला सरासरी १४ हजार ते १८ हजार रुपयांच्या दरम्यान भाव मिळत आहे.

यापुढेही हळदीला चांगली मागणी राहील. पण लागवडीचे चित्र स्पष्ट झाल्यानंतर दरात काहीसे करेक्शन येऊ शकते. त्यानंतर सणांची मागणी वाढल्यानंतर दराला पुन्हा आधार मिळू शकतो, असा अंदाज हळद बाजारातील अभ्यासकांनी व्यक्त केला. 

देशातील बाजारात मागील काही महिन्यांपासून उडदाचे भाव टिकून आहेत. उडदाची बाजाराील आवक खूपच कमी आहे. तर दुसरीकडे मागणी चांगली आहे. सरकारने उडदाचे भाव कमी कऱण्यासाठी अनके निर्णय घेतला.

पण तरीही सरकारला अपेक्षेप्रमाणे भाव पाडता आले नाहीत. सध्या उडदाचा भाव ९ हजार ते १० हजार रुपये प्रतिक्विंटलचा भाव मिळत आहे. उडदाच्या भावातील ही तेजी कायम राहू शकते, असा अंदाज अभ्यासकांनी व्यक्त केला.