हळदीची आवक वाढली

देशातील बाजारात हळदीची आवक वाढत आहे. महाराष्ट्र आणि तेलंगणात हळदीची आवक चांगली आहे. त्यातही तेलंगणाचा हंगाम शिगेला पोचला. त्यामुळे दरपातळीही दबावात आली आहे. तेलंगणाच्या अनेक बाजारात हळदीचे भाव १० हजारांच्या खाली आले आहेत.

तर महाराष्ट्रात हळदीचा भाव १० हजार ते ११ हजारांच्या दरम्यान दिसत आहे. हळदीला सध्या मागणीही चांगली आहे. राज्यातील हळदीची आवक यापुढील काळात वाढण्याचा अंदाज आहे. त्यामुळे हळदीच्या दरावर काहीसा दबाव येऊ शकतो, असा अंदाज हळद बाजारातील अभ्यासकांनी व्यक्त केला.

हरभरा दबावात

पिवळा वाटाणा आयातीच्या धोरणातील अनिश्चितता आणि देशातील बाजारात नव्या मालाची वाढती आवक, यामुळे हरभरा भाव दबावात आले आहेत. बाजार समित्यांमध्ये हळूहळू आवकही सुधारत असल्याचे व्यापारी सांगत आहेत.

आज बाजारात हरभरा ५ हजार १०० ते ५ हजार ५०० रुपयांच्या दरम्यान हरभरा विकला गेला. बाजारातील आवक होळीनंतर वाढण्याची शक्यता आहे. त्यामुळे बाजारात पुढील दीड ते दोन महीने आवकेचा दबाव राहू शकतो. या काळात हरभरा बाजारावरील दबावही कायम राहील, असा अंदाज हरभरा बाजारातील अभ्यासकांनी व्यक्त केला.

पपईला चांगला उठाव

राज्यातील पपईला सध्या चांगली मागणी आहे. त्यामुळे पपईच्या भावातील तेजी टिकून आहे. पपईचे वाढलेले भाव मागील काही दिवसांपासून स्थिर आहेत. वाढती उष्णता आणि रमजान सणामुळे पपईला चांगला उठाव आहे. राज्यातील पपई सध्या देशभरात जात आहे.

त्यामुळे पपईला सध्या १७०० ते २ हजार रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो, असा अंदाज पपई बाजारातील अभ्यासकांनी व्यक्त केला.

सोयाबीन दबावातच

आंतरराष्ट्रीय बाजारात आज सोयाबीन आणि सोयापेंडचे भाव स्थिरावले होते. सोयाबीनचे वायदे आज दुपारपर्यंत १०.१६ डाॅलर प्रतिबुशेल्सवर होते. तर सोयापेंड ३०५ डाॅलर प्रतिटनांवर होते. देशात प्रक्रिया प्लांट्सचे खरेदीचे भाव ४ हजार १०० ते ४ हजार १८० रुपयांच्या दरम्यान होते.

तर बाजार समित्यांमध्ये सोयाबीनला ३ हजार ८०० ते ४ हजार रुपयांच्या दरम्यान भाव मिळाला. सोयाबीनची बाजारातील आवक स्थिर आहे. सोयाबीन भावावरील दबाव आणखी काही आठवडे कायम राहील, असा अंदाज बाजारातील अभ्यासकांनी व्यक्त केला.

कापूस बाजार स्थिर

आंतरराष्ट्रीय बाजारात शुक्रवारी कापसाच्या भावात सुधारणा दिसून आली. कापसाचे वायदे शुक्रवारच्या तुलनेत काहीसे वाढून वायदे ६७.५७ सेंट प्रतिपाऊंडच्या दरम्यान होते. देशातील बाजारात कापसाची आवक कमी होत आहे.

बाजारात कापसाची विक्री ६ हजार ८०० ते ७ हजार रुपयांच्या दरम्यान झाली. कापसाच्या भावात काहीसे चढ उतार मागील आठवडाभर पाहायला मिळाले. बाजारातील कापसाची आवक मार्चनंतर कमी होत जाईल. त्यामुळे दरातही काहीशी सुधारणा अपेक्षित आहे, असे अभ्यासकांनी सांगितले.