Jalgaon News : केळी दर खानदेशात स्थिर आहेत. आवकेत मोठी घट झाली आहे. दर १४००, १५०० ते १८०० रुपये प्रतिक्विंटल, असे आहेत. कमी दर्जाच्या केळीची खरेदी ११०० रुपये प्रतिक्विंटल दरातही सुरू आहे.

सध्या खानदेशात रोज ५० ते ५२ ट्रक (एक ट्रक १६ टन क्षमता) केळीची आवक होत आहे. जळगाव, चोपडा, जामनेर, पाचोरा, भडगाव, चाळीसगाव या भागांत आवक होत आहे. तर यावल, मुक्ताईनगर, रावेरातही काही शेतकऱ्यांच्या पिलबाग किंवा खोडवा केळी पिकात काढणी सुरू झाली आहे.

मध्य प्रदेशातील बुऱ्हाणपुरातही केळीची आवक घटली आहे. तेथील आवक सध्या ३० वाहने (दोन ते १० टन क्षमतेची वाहने) एवढीच आहे. तेथील दरात मात्र सुधारणा दिसत नाही. कमी दर्जाची केळी तेथे येत आहे.

यामुळे तेथे केळी दरात सुधारणा नाही. तेथील केळी दर लिलावात किमान १३५० व कमाल १७०० रुपये प्रतिक्विंटल, असे आहेत. केळीची पाठवणूक उत्तर भारतात केली जात आहे. तेथे दर्जेदार केळीस उठाव आहे.

पंजाब, हरियाना, उत्तर प्रदेश, दिल्ली, काश्मिरात खानदेशातून रोज ३० ते ४० १२ ट्रक केळीची पाठवणूक सुरू आहे. तसेच राज्यातही केळीला मागणी आहे. परंतु दरात मोठी सुधारणा होत नसल्याने केळी उत्पादकांत नाराजी आहे.