Jalgaon News: खानदेशात केळीची कमाल दरपातळी मागील तीन-चार दिवसांत गतीने वधारून २९०० रुपये प्रतिक्विंटलपर्यंत पोहोचली आहे. किमान दर १४०० रुपयांपर्यंत आहेत. केळी आवकेत मोठी घट खानदेशसह मध्य प्रदेशात झाली आहे.

उत्तरेकडील बाजारात गुजरात, मध्य प्रदेशातून केळीची पाठवणूक कमी झाली आहे. खानदेशातील केळीला उठाव वाढला असून, बाजारात पोकळी तयार झाली आहे. दुसरीकडे केळी आवकेतही घट दिसत आहे. यामुळे मागील आठ ते १० दिवसांत केळीचे कमाल दर १९०० रुपयांवरून २९०० रुपये प्रतिक्विंटलपर्य़ंत पोहोचले आहेत.

मध्य प्रदेशातील बऱ्हाणपूरच्या बाजारात गुरुवारी (ता.१५) केळीची १२९ ट्रक (एक ट्रक आठ ते १६ टन क्षमता) आवक झाली. तेथे केळीस कमाल २९६२ रुपये प्रतिक्विंटलचा दर मिळाला. तसेच किमान दर १४०१ रुपये प्रतिक्विंटल, असा होता. बऱ्हाणपुरातील दरानुसार खानदेशात केळीची शिवार किंवा थेट खरेदी केली जाते.

याच दरानुसार खानदेशात केळीची शिवार खरेदी सुरू आहे. दर्जेदार, निर्यातक्षम केळीचे दर २९०० रुपये प्रतिक्विंटल, असे आहेत. कमी दर्जाच्या केळीस १२००, १४०० रुपये प्रतिक्विंटलचे दर आहेत. सरासरी दरपातळी २३०० रुपये प्रतिक्विंटल अशी आहे. केळीची आवक खानदेशात मागील आठ ते १० दिवसांत कमी झाली असून, सध्या प्रतिदिन सरासरी २७५ ट्रक (एक ट्रक १६ टन क्षमता) केळीची आवक होत आहे.

मागील पंधरवड्यात किंवा एप्रिलच्या अखेरीस खानदेशात प्रतिदिन सरासरी ३५० ट्रकपेक्षा अधिकची केळी आवक होती. जळगाव जिल्ह्यातील रावेर, यावल, मुक्ताईनगर, चोपडा, जामनेर, धुळ्यातील शिरपूर, नंदुरबारातील शहादा, तळोदा व अक्कलकुवा भागांत केळीची आवक अधिक आहे. केळी आवक पुढील महिन्यात आणखी कमी होईल, असेही दिसत आहे.