Kolhapur News : केंद्र सरकारने ऑक्टोबर महिन्यासाठी चारच दिवसांच्या कालावधीत देशातील साखर कारखान्यांना पुन्हा १ लाख टन साखरेचा कोटा जाहीर केला आहे. सणासुदीच्या पार्श्‍वभूमीवर हा कोटा जाहीर करण्यात आला आहे. ऑक्टोबरसाठी पहिला कोटा १३ लाख टनांचा तर दुसरा कोटा १५ लाख टनांचा जाहीर करण्यात आला होता.

यात पुन्हा आणखी १ लाख टनांची भर पडली आहे. ऑक्टोबरसाठीचा एकूण कोटा २९ लाख टनांचा झाला आहे. ३१ ऑक्टोंबरअखेर कारखान्ंयाना हा कोटा संपवावा लागणार आहे. इतर नियमांत कोणताच बदल नसल्याचे केंद्र सरकारने कारखान्यांना पाठविलेल्या पत्रात म्हटले आहे. केंद्र सरकारने सणासुदीला साखरेचे दर वाढू नयेत यासाठी विविध उपाययोजना करण्यासाठी धडपड सुरू केली आहे.

साखर विक्रीची माहिती दररोज घेणे, बाजारातील दराची माहिती घेऊन दर न वाढण्यासाठी प्रयत्न करणे आदी बाबींमुळे साखरेचे स्‍थानिक दर फारसे वाढले नसल्याची स्‍थिती आहे. दसरा, दिवाळीच्या पार्श्‍वभूमीवर साठेबाजी होऊ नये, कृत्रिम टंचाई निर्माण करून साखेरेचे किरकोळ बाजारातील भाव व्यापाऱ्‍यांकडून वाढू नयेत यासाठी साखरेचा साठा करणाऱ्या व्यापाऱ्यांचीही चौकशी केंद्रीय स्तरावरून करण्यात येत आहे.

साखरेचा साठा देशात पुरेसा असल्याबाबत केंद्र सरकार ग्राहकांना आश्वस्त करत आहे. साखरेची मागणी वाढल्‍यास केंद्र आणखी साखर विक्रीची परवानगी साखर कारखान्यांना देऊ शकते, असे केंद्रीय सूत्रांनी सागितले.

या पार्श्‍वभूमीवर राज्‍यातील साखर आयुक्‍तालयानेही साठ्याच्या माहितीसंदर्भात कारखान्यांच्या गोदामांची माहिती घेण्यास प्रारंभ केला आहे. राज्यातील प्रत्‍येक प्रादेशिक साखर सहसंचालक कार्यालयाच्या माध्यमातून लवकरच साखरेच्‍या गोदामाची माहिती घेण्यात येणार आहे.