नवी दिल्ली ः कर्नाटकात खरीप हंगामातील कांदा उत्पादन घटले अाहे. त्यात मागणी अधिक अाणि अावक कमी झाल्याने कांद्याचे दर गेल्या अाठवडाभरात वधारले अाहेत. पुढील महिन्यातही कांद्याचे दर चढेच राहणार असल्याची शक्यता व्यापाऱ्यांनी व्यक्त केली अाहे.
सध्या कर्नाटकातील विविध बाजार समित्यांमध्ये कांद्याचे दर प्रतिक्विंटल २,०००-२,४०० रुपये असे अाहेत. पुढील महिन्यात कांद्याचा दर प्रतिक्विंटल २,८०० रुपयांवर पोचण्याची शक्यता अाहे, असा अंदाज कर्नाटकातील बाजार समित्यांमधील व्यापारी संघटनेचे प्रमुख बी. एल. शंकरअप्पा यांनी व्यक्त केला अाहे.
सध्या येथील बाजार समित्यांमध्ये होणारी कांद्याची अावक गेल्या वर्षीच्या तुलनेत ३० टक्क्यांनी कमी अाहे. पाऊस कमी झाल्याने कर्नाटकातील खरिपातील कांदा उत्पादन १३ लाख टनांवरून ४,४९,०००-४,९४,००० टनांपर्यंत खाली अाले अाहे. कर्नाटकातील विविध बाजार समित्यांमध्ये अातापर्यंत ६,३८० टन कांद्याची अावक झाली अाहे.
गेल्या वर्षी याच कालावधीत १७,२८३ टन कांदा अावक झाली होती, अशी माहिती राष्ट्रीय फलोत्पादन संशोधन अाणि विकास फेडरेशनने दिली अाहे.
कांदा उत्पादनात कर्नाटक देशात दुसऱ्या क्रमाकांवर अाहे. येथे खरिपापूर्वी अाणि खरीप हंगामात राज्यातील एकूण उत्पादनाच्या ९० टक्के उत्पादन घेतले जाते.
गेल्या जुलै महिन्यात कांद्याचे दर प्रतिक्विंटल ३००-४०० रुपयांपर्यंत घसरले होते. या पार्श्वभूमीवर खरिपात कांद्याची कमी लागवड झाली होती. त्यात कमी पावसाचा फटका कांदा उत्पादनाला बसला अाहे.
प्रमुख बाजार समित्यांत अावक कमीच
गेल्या काही दिवसांपासून संततधार पाऊस पडत अाहे. त्यामुळे देशातील प्रमुख बाजार समित्यांमध्ये कांद्याची अावक कमी होत असल्याचे चित्र दिसत अाहे. कांदा उत्पादनात अाघाडीवर असलेल्या महाराष्ट्रातील अाणि मध्य प्रदेशातील कांदा जेव्हा बाजारात येईल; त्यावेळी कांद्याचे दर काही प्रमाणात कमी होतील, असा अंदाज व्यापाऱ्यांनी बांधला अाहे.
महाराष्ट्रातही दर वधारणार
गुजरात अाणि राजस्थानमध्ये पुरामुळे कांद्याचे नुकसान झाले अाहे. यामुळे या राज्यांतूनही कांद्याची अावक कमी अाहे. अाशियातील सर्वात मोठी कांद्याची बाजारपेठ असलेल्या महाराष्ट्रातील लासलगाव येथे पुढील महिन्यात कांद्याचे घाऊक दर प्रतिक्विंटल ३,५००-३,७०० रुपयांपर्यंत पोचतील, असा अंदाज बाजार तज्ज्ञांनी व्यक्त केला अाहे.
लासलगाव येथे कांद्याचे दर प्रतिक्विंटल २,४०० -२,७०० रुपयांवर पोचले अाहेत. सणाच्या पार्श्वभूमीवर कांद्याला मागणी वाढून दर वधारण्याची शक्यता अाहे. अाॅक्टोबरच्या अखेरीस कांद्याचे घाऊक दर प्रतिक्विंटल ३,५००-३,७०० रुपयांवर पोचणे अपेक्षित अाहे, असे लासलगाव येथील व्यापारी मनोज जैन यांनी म्हटले अाहे.