नवी दिल्ली ः देशातील भात, भरडधान्ये, तेलबिया पीक क्षेत्रात काही प्रमाणात घट झाली अाहे. मात्र कापूस पीक क्षेत्र यंदा गेल्या वर्षीच्या तुलनेत तब्बल १९.१६ लाख हेक्टरने अधिक असल्याचे कृषी मंत्रालयाने जाहीर केलेल्या अाकडेवारीनुसार दिसून अाले अाहे.

 

देशात शुक्रवार (ता.२२) पर्यंत खरीप पीक क्षेत्र १०५४.९७ लाख हेक्टरवर होते. गेल्या वर्षी याच कालावधीत १०६३.२८ लाख हेक्टरवर पीक क्षेत्र होते. एकूणच पीक क्षेत्र गेल्या वर्षीच्या तुलनेत कमी अाहे. मात्र कापूस पिकाने अधिक क्षेत्र व्यापले अाहे.

 

देशात यंदा १२१.७२ लाख हेक्टरवर कापूस पीक क्षेत्र अाहे. गेल्या वर्षी याच कालावधीत १०२.५६ लाख हेक्टरवर कापूस पीक क्षेत्र होते. तेलंगणा, महाराष्ट्र, राजस्थान, हरियाना, अांध्र प्रदेश, तमिळनाडू, ओडिशा, मध्य प्रदेश, कर्नाटक, पंजाब, गुजरात अादी राज्यांत कापूस पीक क्षेत्र अाहे. तेलंगणा, महाराष्ट्र, राजस्थान, हरियाना अादी राज्यांत कापूस पीक क्षेत्रात अधिक वाढ झाली अाहे.

 

भात पीक ३७६.७६ लाख हेक्टरवर व्यापले अाहे. गेल्या वर्षी ३८१.७५ लाख हेक्टरवर भात पीक क्षेत्र होते. कडधान्ये पीक १४१ लाख हेक्टरवर, तर भरडधान्यांची लागवड  १८५.३५ लाख हेक्टरवर झाली अाहे, अशी माहिती कृषी मंत्रालयाने दिली अाहे. 

 

तेलबिया पीक १६ लाख हेक्टरने कमी

तेलबिया पीक क्षेत्र गेल्या वर्षीच्या तुलनेत १६.४१ लाख हेक्टरने कमी अाहे. यंदा १७२.९४ लाख हेक्टरवर तेलबिया पीक क्षेत्र अाहे. गेल्या वर्षी ते याच कालावधीत १८९.४५ लाख हेक्टरवर होते. विशेषतः मध्य प्रदेश, अांध्र प्रदेश, तेलंगणा, कर्नाटक, छत्तीसगड, ओडिशा, पंजाब अादी राज्यांत तेलबिया पीक क्षेत्रात घट झाली अाहे.

 

उत्तर प्रदेश, महाराष्ट्रात ऊस क्षेत्रात वाढ

ऊस पीक क्षेत्र ४९.९५ लाख हेक्टरवर पोचले अाहे. गेल्या वर्षीच्या तुलनेत यंदा ऊस पीक क्षेत्रात वाढ झाली अाहे. गेल्या वर्षी ४५.६४ लाख हेक्टरवर ऊस पीक क्षेत्र होते. उत्तर प्रदेश, महाराष्ट्र अादी प्रमुख राज्यांत ऊस पीक क्षेत्रात वाढ झाली अाहे. तर तमिळनाडू, कर्नाटकमधील ऊस पीक क्षेत्रात घट झाली असल्याचे दिसून अाले अाहे.

कापूस पीक क्षेत्र (लाख हेक्टरमध्ये)

राज्य	२०१७-१८	२०१६-१७
अांध्र प्रदेश	५.९५	४.३५
तेलंगणा	१८.६६	१२.३६
गुजरात	२६.३६	२४.०९
हरियाना	६.५६	४.९८
कर्नाटक	४.७७	४.४२
मध्य प्रदेश	५.९९	५.९९
महाराष्ट्र	४२.०४	३८.०६
ओडिशा	१.४५	१.३६
पंजाब	३.८५	२.५६
राजस्थान	५.०३	३.८४
तमिळनाडू	०.७६	०.४०
इतर	०.२८	०.१७
एकूण	१२१.७२	१०२.५५

स्त्रोतः कापूस विकास संचालनालय, नागपूर