कोल्हापूर : सरकारने पाकिस्तानातून कोणतीही साखर आयात केलेली नाही. जर साखर बेकायदेशीर पद्धतीने आलेली असेल त्याचा शोध घेऊन संबंधितावर कारवाई केली जाईल, असा इशारा सहकारमंत्री सुभाष देशमुख यांनी दिला आहे. गेल्या दोन दिवसांपासून पाकिस्तानची सुमारे तीस हजार क्विंटल साखर भारतात आयात झाल्याने राजकारण तापले आहे. या पार्श्‍वभूमीवर मंत्री देशमुख यांनी हा खुलासा केला आहे. सध्या साखरेची स्थिती बिकट असतानाच सरकार पाकिस्तानातून साखर कशी आयात करेल, असा सवाल मंत्री देशमुख यांनी केला. आलेली साखर ही दोन महिन्यांपूर्वी आलेली असेल किंवा एखाद्या व्यापाऱ्याने मुद्दामहून ती आणली असेल. यामुळे जर ही साखर बेकायदेशीरपणे आली असेल, तर संबंधितांवर नक्कीच कारवाई करण्यात येईल, असे मंत्री देशमुख यांनी सांगितले. यासाठी व्यापाऱ्यांचे साठेही तपासण्यात येतील, असे श्री. देशमुख यांनी स्पष्ट केले. सध्या साखरेची स्थिती बिकट आहे. आंतराष्ट्रीय तसेच देशांतर्गत बाजारातही साखरेचे दर घसरले आहेत. सरकारने साखर निर्यात व्हावी यासाठी प्रयत्न सुरू केले आहेत. टनाला ५५ रुपये अनुदान देण्याचेही जाहीर केले आहे. आयातीवर शंभर टक्के कर लावला आहे. इतका खटाटोप करत असताना सरकार पाकिस्तानची साखर आयात कशी करेल, असा सवाल श्री. देशमुख यांनी केला आहे.