Nanded News : जिल्ह्यात किमान हमीदरानुसार तुरीची खरेदी होत आहे. जिल्ह्याची तुरीची अंदाजित उत्पादकता यंदा हेक्टरी नऊ क्विंटल जाहीर झाल्यामुळे शेतकऱ्यांना हेक्टरी नऊ क्विंटल तूर विक्री करता येईल.

यंदा जिल्ह्यात १३ हजार ७२६ टन तूर खरेदीचे लक्ष्यांक निश्‍चित करण्यात आले आहे. परंतु अनेक शेतकऱ्यांच्या सातबारावर तुरीचा पेरा नोंदला नसल्याची अडचण असल्यामुळे तूर विक्रीसाठी मर्यादा आली आहे.

नांदेड जिल्ह्यात किमान आधारभूत किंमत खरेदी योजनेअंतर्गत एनसीसीएफच्या माध्यमातून पणन महासंघ, विदर्भ सहकारी पणन महासंघ तसेच काही शेतकरी उत्पादक कंपनीच्या संघाकडून मिळालेल्या खरेदी केंद्रावर तूर खरेदी करण्यात येणार आहे. या केंद्रावर जिल्ह्यातील शेतकऱ्यांना हेक्टरी नऊ क्विंटल तूर विक्री करता येणार आहे.

प्रशासनाने अंदाजित उत्पादकता जाहीर केली. यात नांदेडला ४० हजार ९०२ टन एकूण उत्पादन होईल, असा अंदाज व्यक्त केला आहे. तर यापैकी २५ टक्के खरेदीनुसार नांदेड जिल्ह्यात १३ हजार ७२६ टन तूर हमीदरानुसार खरेदी होणार असल्याचे शासनाच्या आदेशात म्हटले आहे.

दरम्यान जिल्ह्यात तूर खरेदीसाठी २४ जानेवारीपासून तीस दिवसापर्यंत ऑनलाइन पोर्टलवर नोंदणीसाठी मुदत होती. या केंद्रावर तूर खरेदी १३ फेब्रुवारीपासून सुरू झाली. परंतु अपेक्षित नोंदणी झाली नसल्याने राज्य शासनाने पुन्हा ३० दिवसांची मुदतवाढ दिली. दरम्यान, शेतकऱ्यांच्या सातबारावर तुरीचा पेरा नोंद नसल्यामुळे नोंदणीची प्रक्रिया रखडली आहे.

सध्या राज्याच्या पणन विभागाने पेरा नोंदीबाबत पत्र काढून सोयाबीन, उडीद व मूग या क्षेत्रात आंतरपीक म्हणून तुरीचा पेरा नोंदविलेल्या शेतकऱ्यांचे संपूर्ण क्षेत तर कपाशीत आंतरपीक म्हणून तुरीचा पेरा लावलेल्या क्षेत्रापैकी अर्धे क्षेत्र तुरीचे गृहीत धरले जाणार आहे. यामुळे शेतकऱ्यांना काही प्रमाणात दिलासा मिळाला असला तरी अनेक शेतकऱ्यांनी आंतरपीक म्हणून तुरीचा पेरा लावला नसल्याची माहिती पुढे आली आहे.