Jalgaon News : सर्वसामान्यांना सोने घेणे आता आवाक्याबाहेर झाले आहे. एक तोळा सोन्याचा दर शुक्रवारी (ता. १२) ७५ हजार १९० रुपये (जीएसटीसह) होता, तर चांदीनेही ८६ हजार ५२० प्रतिकिलोचा टप्पा गाठला असून चांदीही सर्वसामान्यांच्या आवाक्याबाहेर गेली आहे.

गुढीपाडव्याला सकाळी सोन्याचा दर ७३ हजार ५४२ रुपयांवर (प्रतितोळा, जीएसटीसह) होता. त्यात लगेचच एक हजाराची वाढ होऊन सोने ७४ हजार ३६६ रुपयांवर पोहोचले आहे. चांदीच्या दरातही तीन हजारांची वाढ होऊन चांदी ८५ हजार ३८७ वर आली आहे.

महिनाभरात सोनेदरात सात हजार रुपयांची वाढ झाली आहे. चांदी दरातही सतत वाढ होत आहे. डिसेंबर ते जानेवारी या कालावधीत सोने व चांदी दरात मोठी वाढ दिसली नाही. किरकोळ वाढ व काहीशी घटही होती. फेब्रुवारीत सोने दरात रोज ३० रुपयांची घसरण दिसली होती.

परंतु मार्चमध्ये सोने दरात सतत वाढ झाली आहे. आखातातील युद्धजन्य स्थिती, अमेरिकेतील वित्तीय संकट, तेथील बँकांकडून सुरू असलेली व्याजदरवाढ यामुळे सोने दर सतत वाढल्याचे येथील सराफा व्यावसायिकांचे म्हणणे आहे. ऐन लग्नसराईत ही दरवाढ झाल्याने ग्रामीण भागातील मंडळींचे बजेट कोलमडले आहे.