Sangli News : राज्यातील बाजारपेठेत अंदाजे ५० टन ड्रॅगन फ्रूटची विक्री होत आहे. ड्रॅगन फ्रूटचा पहिला बहार अंतिम टप्प्यात आला आहे. बाजारपेठेत या फळाची मागणी वाढली असून गेल्या पंधरा दिवसांपासून दर टिकून आहेत.

त्यामुळे ड्रॅगन उत्पादकांमध्ये काहीअंशी दिलासा मिळाला आहे. ऑगस्टच्या मध्यापासून दुसरा बहार सुरू होईल. या दरम्यान, बाजारात फळांची आवक वाढणार असून दर टिकून राहतील, असा अंदाज शेतकऱ्यांनी व्यक्त केला.

यंदा ड्रॅगन फ्रूटचा हंगाम वेळेत सुरू झाला आहे. परंतु वातावरणातील बदलामुळे पहिल्या बहारातील फळांची काढणी मागे पुढे झाली आहे. त्यामुळे बहुतांश भागातील पहिल्या बहरातील ड्रॅगन फ्रूटची काढणी आटोपली आहे.

अनेक ठिकाणी पहिल्या बहरातील काढणी सुरू आहे. पहिल्या बहरात फळांची संख्या कमी असल्याने बाजारात फारशी आवक होत नसते. त्यामुळे या वेळी बाजारात आवक कमी होती. मात्र दर अपेक्षित मिळाले. जुलै महिन्याच्या पहिल्या आठवड्यात पांढऱ्या ड्रॅगन फ्रूटला प्रति किलोस १००, तर लाल ड्रॅगन फ्रूटला १२० रुपये असा दर होता.

जुलैच्या मध्यापासून सद्यःस्थितीला मुंबई, पुणे, सांगली यासह अन्य शहरांतील बाजारपेठेत अंदाजे ड्रॅगन फ्रूटची आवक काही प्रमाणात वाढली आहे. या बाजारपेठेत दररोज ५० टन ड्रॅगन फ्रूट विक्रीसाठी दाखल होत आहेत.

गेल्या पंधरा दिवसांपासून ड्रॅगन फ्रूटचे दर टिकून आहेत. त्यामुळे शेतकऱ्यांना काही अंशी दिलासा मिळाला आहे. ड्रॅगन फ्रूटचा दुसरा बहार ऑगस्टच्या मध्यापासून सुरू होण्याची शक्यता आहे.

या कालावधीत गणपती उत्सव असल्याने फळांना चांगली मागणी असून फळांचा चांगला उठाव होतो. यामुळे स्पर्धेतून दरही चांगले मिळतात. त्यामुळे या महिनाभरात ड्रॅगन फ्रूटचे दर टिकून राहण्याची शक्यता आहे.

दर स्थिती :

पांढरे ड्रॅगन फ्रूट : १०० रुपये प्रतिकिलो

लाल ड्रॅगन फ्रूट : १२० रुपये प्रतिकिलो