Parbhani News : केंद्र शासनाच्या आधारभूत किंमत खरेदी योजनेअंतर्गत (पिएसएस) खरीप हंगाम २०२४-२५ मधील तूर हमीभावाने (प्रतिक्विंटल ७५५०रुपये) विक्रीसाठी पणन महासंघ अंतर्गत परभणी जिल्ह्यातील १८ आणि हिंगोली जिल्ह्यातील १५ मिळून एकूण ३३ केंद्रांपैकी शुक्रवार (ता. २८) पर्यंत १९ केंद्रांवर १ हजार ३५२ शेतकऱ्यांनी ऑनलाइन केली आहे. परंतु तूर खरेदी सुरू झालेली नाही, अशी माहिती जिल्हा पणन अधिकारी कुंडलिक शेवाळे यांनी दिली.

केंद्रिय नोडल एजन्सी नाफेडच्या वतीने हमीभावाने तूर खरेदी करिता परभणी जिल्ह्यात राज्य सहकरी पणन महासंघ अंतर्गतच्या परभणी, पेडगाव, झरी, वरपुड, जिंतूर, बोरी, भोगाव, सेलू, मानवत, रूढीपाटी, पाथरी, देवनांदरा, सोनपेठ, पालम, चाटोरी, पूर्णा, एरंडेश्‍वर, ताडकळस या १८ केंद्रापैकी १० केंद्रावर ५८९ शेतकऱ्यांनी ऑनलाइन नोंदणी केली आहे.

यंदा हमीभावाने तूर खरेदीसाठी परभणी जिल्ह्यासाठी प्रतिहेक्टरी १०.५० क्विंटल उत्पादकता निश्‍चित करण्यात आली असून, १० हजार २२५ टन तूर खरेदीचे उद्दिष्ट आहे. केंद्रिय नोडल एजन्सी एनसीसीएफच्या वतीने तूर खरेदी करिता हिंगोली जिल्ह्यात राज्य सहकारी पणन महासंघ अंतर्गंत हिंगोली, कन्हेरगाव, कळमनुरी, वारंगा, वसमत, जवळा बाजार, येळेगाव, सेनगाव, साखरा, शिवणी खुर्द, फाळेगाव, नागासिनगी, आडगाव, उमरा, पुसेगाव या १५ केंद्रापैकी ९ केंद्रांवर ७६३ शेतकऱ्यांनी ऑनलाइन नोंदणी केली आहे.

हिंगोली जिल्ह्यासाठी प्रतिहेक्टरी ११.५० क्विंटल उत्पादकता निश्‍चित करण्यात आली असून ८ हजार ८६५ टन तूर खरेदीचे उद्दिष्ट आहे. ऑनलाइन नोंदणीकरिता शेतकऱ्यांनी सोबत २०२४-२५ मधील ७-१२ उताऱ्यावर ऑनलाइन पिकपेरा नोंद असावी, आधारकार्ड झेरॉक्स, बँक पासबुकची झेरॉक्स आणावी.

बँक पासबुकवर शेतकऱ्यांचे नाव, खाते क्रमांक, आयएफएससी कोड स्पष्ट असावा. जनधन बँक खाते क्रमांक किंवा पतसंस्थेतील खाते क्रमांक देऊ नये. संबंधित तालुक्यातील केंद्राच्या ठिकाणी शेतकऱ्यांनी नोंदणी करावी, असे आवाहन कुंडलिक शेवाळे यांनी केले आहे.

परभणी-हिंगोली जिल्हे हमीभावाने तूर विक्रीसाठी ऑनलाइन शेतकरी नोंदणी स्थिती

केंद्र ऑनलाईन शेतकरी नोंदणी

बोरी १५२

सेलू १९७

पेडगाव ९०

रुढीपाटी ५२

देवनांदरा ६२

सोनपेठ १

पालम ६

चाटोरी ८

पूर्णा १२

एरंडेश्वर ९

हिंगोली २६१

फाळेगाव ४४३

कळमनुरी २३

वसमत ५

जवळाबाजार १

साखरा ११

नागासिनगी १०

उमरा २

पुसेगाव ७