Parbhani News : परभणी व हिंगोली जिल्ह्यांत शुक्रवार (ता. २४)पर्यंत सीसीआयच्या ११ केंद्रांवर ९ लाख १६ हजार ४९१ क्विंटल आणि खासगी ३ लाख ५९ हजार ८७१ क्विंटल मिळून एकूण १२ लाख ५६ हजार १३२ क्विंटल कापूस खरेदी झाली आहे.

सीसीआयकडून एमएसपीने परंतु ओलाव्याच्या प्रमाणानुसार प्रतिक्विंटल किमान ७००० ते कमाल ७४७१ रुपये दर देण्यात आले. खासगी व्यापाऱ्याकडून प्रतिक्विंटल ६५०० ते कमाल ७२५० रुपये दराने कापूस खरेदी करण्यात आली.

राज्य सहकारी कापूस उत्पादक पणन महासंघाच्या परभणी झोन अंतर्गत यंदा परभणी, बोरी, जिंतूर, सेलू, मानवत, पाथरी, गंगाखेड, ताडकळस, हिंगोली, वसमत, जवळाबाजार या ११ ठिकाणच्या २० जिनिंग कारखान्यांमध्ये सीसीआयतर्फे किमान आधारभूत किंमत दराने कापूस खरेदी केली जात आहे.

शुक्रवार (ता. २४)पर्यंत परभणी जिल्ह्यातील ८ केंद्रांवरील १७ जिनिंग कारखान्यांमध्ये ७ लाख ८६ हजार ६९५ क्विंटल कापसाची खरेदी झाली. हिंगोली जिल्ह्यातील ३ केंद्रांवर १ लाख २९ हजार ७९६ क्विंटल कापूस खरेदी झाली.

परभणी आणि हिंगोली जिल्ह्यातील ११ कृषी उत्पन्न बाजार समित्यांअंतर्गंत ४४ जिनिंग कारखान्यांमध्ये खासगी व्यापाऱ्याकडून कापूस खरेदी सुरू आहे. शुक्रवार (ता. २४)पर्यंत परभणी जिल्ह्यातील ३९ जिनिंग कारखान्यांमध्ये ३ लाख ३३ हजार ७७४ क्विंटल कापूस खरेदी झाली असून, प्रतिक्विंटल किमान ६५०० ते कमाल ७२५० रुपये दर मिळाले.

हिंगोली जिल्ह्यात ५ जिनिंग कारखान्यांमध्ये २६ हजार ९७ क्विंटल कापूस खरेदी झाली असून, प्रतिक्विंटल किमान ६९०० ते कमाल ७१०० रुपये दराने खरेदी करण्यात आली, अशी माहिती पणन महासंघाच्या सूत्रांनी दिली.