नांदेड : जिल्ह्यातील १९१ जनावरांना ‘लम्पी स्कीन’ची (Lumpy Skin Disease) बाधा झाली आहे. तर आज पर्यंत १७ जनावरांचा लम्पी आजारामुळे मृत्यू झाला आहे. लम्पीच्या नियंत्रणासाठी तीन लाख ६३ हजार ४६६ जनावरांचे लसीकरण (Lumpy Vaccination) पूर्ण झाले आहे.

नऊ पशुपालकांना शासनाच्या निकषानुसार अर्थसाहाय्य देण्यात आले आहे. इतर प्रकरणाच्या प्रस्तावाची निकषानुसार प्रक्रिया सुरू असल्याची माहिती जिल्हा पशुसंवर्धन उपआयुक्त डॉ. मधुसूदन रत्नपारखी यांनी दिली.

जिल्ह्यात लम्पीमुळे बाधित जनावरांच्या संख्येत दररोज वाढ होत आहे. या रोगामुळे जनावरांच्या बाजारावर परिणाम झाला आहे. बाधित जनावरांचे मृत्यूचे प्रमाणही वाढल्याने पशुपालकांना चिंता लागली आहे. आजच्या घडीला नांदेड जिल्ह्यातील ४६ गावे लम्पी बाधित आहेत.

या ४६ गावातील २२ हजार ७६८ जनावरांची सख्या आहे. यातील १९१ बाधित जनावरांना वेगळे काढून त्यांच्यावर उपचार केले जात आहेत. बाधित गावाच्या पाच किमी परिघातील गावांची संख्या २८६ आहे. एकूण बाधित गावे ३३२ झाली आहेत.

या बाधित ४६ गावांच्या पाच किलोमीटर परिघातील ३३२ गावात ९४ हजार ४७६ जनावरे आहेत. लम्पीमुळे आजपर्यंत १७ जनावरांचा मृत्यू झाला आहे. पशुपालकांनी घाबरून न जाता आपल्या पशूची स्वच्छता, गोठ्यातील स्वच्छता व पशुवैद्यकीय अधिकारी यांनी सांगितल्याप्रमाणे काळजी घ्यावी, असे आवाहन जिल्हा प्रशासनाने केले आहे.

सात जिल्ह्यात शंभर जनावरांचा मृत्यू

मराठवाड्यातील आठ पैकी सात जिल्ह्यात लम्पी आजाराने जनावरांना आपल्या विळख्यात घेतले आहे. रविवार (ता. २) पर्यंत या सातही जिल्ह्यात जवळपास १०३ जनावरांना आपला जीव गमवावा लागला आहे. त्यामध्ये सर्वाधिक मृत्यू झालेल्या जनावरांची संख्या औरंगाबाद जिल्ह्यात आहे.