Manor News : पालघर जिल्ह्यातील मुख्य रस्त्यांवर मोकाट जनावरांमुळे अपघातांची संख्या वाढत आहे. हे अपघात रोखण्यासाठी पोलिस अधीक्षकांच्या मार्गदर्शनाखाली मोकाट जनावरांच्या गळ्यात रेडियमचे पट्टे बांधण्याची मोहीम राबवण्यात आली आहे.

त्याची सुरुवात गुरुवारी सकाळपासून करण्यात आली. उपक्रमादरम्यान १२००पेक्षा अधिक जनावरांच्या गळ्यात हे पट्टे बांधले आहेत.

पट्ट्यांमुळे वाहनांच्या हेड लाइटचा प्रकाश परावर्तीत होऊन रात्रीच्या वेळी होणारे अपघात रोखण्यास मदत होणार असल्याची माहिती वाहतूक शाखेच्या वतीने देण्यात आली.

जिल्ह्यात मोकाट जनावरे मोठ्या संख्येने आहेत. रात्री रस्त्यावर फिरणाऱ्या जनावरांना वाहने धडकून होणाऱ्या अपघातांच्या संख्येत वाढ झाली आहे.

जनावरांमुळे होणारे अपघात रोखण्यासाठी उपाययोजना करण्याच्या सूचना पोलिस अधीक्षकांनी वाहतूक शाखेला दिल्या होत्या. या सूचनेनुसार वाहतूक शाखेचे प्रभारी सुरेश साळुंखे यांच्या मार्गदर्शनाखाली मोहीम राबवण्यात आली.

मनोर, पालघर, बोईसर, वाणगाव, सफाळे, मनोर, तारापूर, तलासरी, डहाणू, वाडा, कासा आणि मोखाडा येथे वाहतूक शाखेत कार्यरत ६० अंमलदारांनी मोहीम राबवली.