Jalgaon News : खानदेशात उन्हाळ हंगाम सुरू होताच पशुधनाचे बाजार गजबजल्याचे दिसत आहे. उमद्या बैलजोड्यांची खरेदी करण्यासाठी अनेक शेतकरी मध्य प्रदेशात जात आहे. बैलजो़ड्यांचे दर तेथे वाढले आहेत.

बैलजोड्यांचे दर जनेवारीनंतर वाढण्यास सुरुवात होते. कारण पुढे खरिपासंबंधीच्या कामांसाठी अनेक शेतकरी नव्या बैलजोड्यांच्या शोधात असतात. अशातच खानदेशातील प्रसिद्ध बैलबाजार गजबजले आहेत.

काही शेतकरी बैलजोड्यांसाठी गावोगावी नातेवाईक, परिचितांकडे संपर्क साधून बैलजोड्यांसंबंधी विचारणा, चाचपणी करीत आहेत. तर काही शेतकरी थेट मध्य प्रदेशातील बडवानी, बऱ्हाणपूर, खरगोन येथील बाजारांमध्ये किंवा पाड्यांवर जाऊन बैलजोड्यांची खरेदी करीत आहेत.

खानदेशात बैलांसाठी जळगाव जिल्ह्यात वरखेडी (ता. पाचोरा), नेरी (ता. जामनेर), सावदा (ता. रावेर), चोपडा, वैजापूर (ता. चोपडा), धुळ्यातील साक्री हे बाजार प्रसिद्ध आहेत. तर शेळ्यांसाठी पारोळा, नेरी, साक्री, चोपडा, वैजापूर, फैजपूर, किनगाव येथील बाजार प्रसिद्ध आहेत. उमद्या बैलजोड्यांची शोधाशोध शेतकऱ्यांना करावी लागत आहे. अनेक शेतकरी आपल्या नातेवाइकांकडून बैलजोड्या खरेदी करून घेत आहेत. त्यात अधिकचे पैसे लागत आहेत.\

मध्य प्रदेशात सध्या एक लाख ते सव्वा लाख रुपयात बैलजोड्या मिळत आहेत. खरिपातील कामे गती घेत आहेत. भाडेतत्त्वावर बैलजोड्या देऊन अनेक शेतकरी वित्तीय स्रोत तयार करतात. एक हजार ते १२०० रुपये रोज, अशी मजुरी बैलजोडीकरवी मशागतीसंबंधी बैलजोडीमालकास मिळते. सध्या वरखेडी, चाळीसगाव, चोपडा, सावदा येथील बाजारात बैलजोड्या विक्रीतून मोठी उलाढाल होत आहे.